یو این آئی
کولکتہ// کے پھل پٹی مچھوا علاقے کے قریب ایک ہوٹل میں منگل کی رات شدید آگ لگنے سے 14لوگوں کی موت ہو گئی۔ یہ دردناک حادثہ رات تقریباً 8:15بجے ریتوراج ہوٹل میں پیش آیا۔ آگ لگنے کے بعد موقع پر فائر بریگیڈ کی گاڑیاں پہنچیں اور فوری طور پر آگ پر قابو پایا لیکن تب تک کئی لوگوں کی جان جا چکی تھی۔موقع پر موجود کولکتہ کے پولیس کمشنر منوج کمار ورما نے بتایا کہ اب تک 14لاشیں برآمد کی جا چکی ہیں جبکہ کئی لوگوں کو ریسکیو کرکے محفوظ طور پر باہر نکال لیا گیا ہے۔ انہوں نے کہا کہ فی الحال آگ پر قابو پا لیا گیا ہے۔ آگ کیسے لگی اس کی جانچ کی جاری ہے۔ جانچ کیلئے خصوصی ٹیم تشکیل دی گئی ہے۔مغربی بنگال کانگریس کے صدر شبھنکر سرکار نے حادثے پر افسوس کا اظہار کرتے ہوئے ریاستی حکومت کو نشانہ بنایا۔ انہوں نے کہا کہ حکومت کی طرف سے وہاں تحفظ کا کوئی انتظام نہیں تھا۔ مجھے نہیں معلوم کہ حکومت کیا کر رہی ہے۔ اس دوران کولکتہ کے میئر فرہاد حکیم بھی جائے وقوع پر پہنچے۔مرکزی وزیر اور مغربی بنگال بی جے پی کے صدر سوکانت مجمدار نے بھی حادثے پر ریاستی حکومت سے فوراً کارروائی کا مطالبہ کیا ہے۔ انہوں نے کہا، میں ریاستی حکومت سے اپیل کرتا ہوں کہ وہ فوری راحت اور بچاو کام کرے، زخمیوں کو بہتر طبی علاج اور انسانی مدد مہیا کرائے۔ اس کے ساتھ ہی آگ جیسی واردات کو روکنے کے لیے فائر سیفٹی انتظامات کی سخت نگرانی کی جائے۔فی الحال آگ لگنے کی وجہ معلوم نہیں ہو سکی ہے۔ ہوٹل میں لگی آگ اتنی شدید تھی کہ لوگ جان بچانے کے لیے عمارت سے کود پڑے جس سے کئی لوگوں کو چوٹیں بھی آئیں۔ حالانکہ اس دوران فائر بریگیڈ کی ٹیم نے مستعدی دکھائی اور کئی لوگوں کو وقت رہتے بچا لیا۔ادھر وزیر اعظم نریندر مودی نے کولکتہ کے ایک ہوٹل میں آتشزدگی اور جانوں کے ضیاع پر غم کا اظہار کیا ہے اور مرنے والوں کے لواحقین کو وزیر اعظم کے قومی ریلیف فنڈ (پی ایم این آر ایف)سے 2لاکھ روپے اور زخمیوں کو 50000روپے دینے کا اعلان کیا ہے۔ مودی نے بدھ کو سوشل میڈیا پلیٹ فارم ایکس پر کہا کہ کولکتہ میں آتشزدگی کے حادثے میں جانوں کے ضیاع سے غمزدہ ہوں۔ اپنے پیاروں کو کھونے والوں کے تئیں میری دلی ہمدردی ہے۔ میں زخمیوں کی جلد صحت یابی کی خواہش کرتا ہوں۔
