آفیسران کوعوامی شکایات پر فوری کارروائی اور مسائل حل کرنے کی ہدایت جاری
عظمیٰ نیوز سروس
نوشہرہ //جموں وکشمیر کے نائب وزیر اعلیٰ سریندر چوہدری نے سیری میں ایک عوامی رابطہ پروگرام کا انعقاد کیا، جس کا مقصد مقامی عوام کے مسائل کو سننا اور ترقیاتی کاموں کا جائزہ لینا تھا۔ اس پروگرام میں عوام نے بھرپور شرکت کی اور مختلف ترقیاتی مسائل کو اٹھایا، جن کے حل کے لئے فوری مداخلت کی اپیل کی گئی۔عوامی سطح پر اہم مسائل میں سرکاری دفاتر کے لئے ملٹی اسٹوری عمارت کی تعمیر، اسکولوں کی اپ گریڈیشن، تدریسی اور طبی عملے کی کمی اور سیری میں پرائمری ہیلتھ سینٹر میں سہولتوں کی کمی شامل تھی۔ عوام نے ٹیکنیکل اسٹاف کی تعیناتی، ایکسرے مشین اور لیبارٹری کی سہولتوں کی فراہمی، ڈینٹل چیئر کا بندوبست کرنے اور کلال اور سیل میں نئے ویٹرنری سینٹرز کے قیام کی بھی درخواست کی۔دیگر اہم مسائل میں ایک گرڈ اسٹیشن کے لئے ایڈمنسٹریٹیو اپروول کی منظوری میں تاخیر، بجلی کے کھمبے اور تاروں کی ضرورت، نئے ٹرانسفارمرز کی تنصیب اور موجودہ ٹرانسفارمرز کی اپ گریڈیشن شامل تھے۔ عوام نے جل جیون مشن کے کاموں کی تیز تر تکمیل، پنچایتوں کی تقسیم اور چیک ڈیمز کی تعمیر کی بھی درخواست کی۔ڈپٹی چیف منسٹر نے عوامی شکایات کے فوری حل کے لئے متعلقہ افسران کو ہدایات جاری کیں۔ انہوں نے اسکولوں اور صحت کے اداروں میں عملے کی تعداد کو متوازن کرنے کی ضرورت پر زور دیا تاکہ کمی کو دور کیا جا سکے۔ انہوں نے کہا کہ جل جیون مشن کے کاموں کو رہنما اصولوں کے مطابق انجام دیا جائے تاکہ ہر پنچایت تک پانی کی فراہمی یقینی بنائی جا سکے۔ڈپٹی سی ایم نے افسران کو ہدایت دی کہ وہ صرف فیلڈ اسٹاف کی رائے پر انحصار نہ کریں بلکہ ہر پنچایت کا دورہ کر کے حقیقی صورتحال کا جائزہ لیں۔ انہوں نے کہا کہ کرپشن برداشت نہیں کی جائے گی ۔ڈپٹی سی ایم نے پانی کے وسائل کی حفاظت اور ماحولیاتی نقصان سے بچاوکے لئے پانی کے ذرائع کے قریب مائننگ کی سرگرمیوں پر سخت پابندی عائد کرنے کا حکم دیا۔اس پروگرام میں ایڈیشنل ڈپٹی کمشنر راجوری، راج کمار تھاپا؛ ایڈیشنل ڈپٹی کمشنر نوسہرہ، بابو رام ٹنڈن؛ ایڈیشنل ڈپٹی کمشنر سندربانی، راجیو ماگوترا اور دیگر ضلع و شعبہ جاتی افسران نے بھی شرکت کی۔
سریندر چوہدری نے نوشہرہ میں ترقیاتی کاموں کا سنگ بنیاد رکھا
عظمیٰ نیوز سروس
نوشہرہ//ڈپٹی چیف منسٹر سریندر چوہدری نے نوشہرہ کے پی ڈبلیو ڈی ڈاک بنگلہ میں کانفرنس ہال کی اپ گریڈیشن اور پلاش نوشہرہ کی ری ماڈلنگ کیلئے سنگ بنیاد رکھا۔کانفرنس ہال کی اپ گریڈیشن کی منصوبہ بندی 249.39 لاکھ روپے کی لاگت سے کی گئی ہے، جس کا مقصد علاقے میں کانفرنسز اور میٹنگز کے لئے جدید سہولتیں فراہم کرنا ہے۔ اس موقع پر بات کرتے ہوئے سریندر چوہدری نے حکومت کے عزم کا اظہار کیا اور کہا کہ یہ منصوبے بہتر حکومتی کام کاج اور عوامی خدمت کی فراہمی میں مددگار ثابت ہوں گے۔پلاش نوشہرہ کی ری ماڈلنگ کا کام بھی 107.48 لاکھ روپے کی تخمینی لاگت سے شروع کیا گیا، جو مقامی لوگوں کے لئے بہتر ماحول فراہم کرے گا۔اس تقریب میں پی ڈبلیو ڈی کے افسران، مقامی انتظامیہ اور عوامی نمائندے بھی موجود تھے۔ ان تمام افراد نے دونوں منصوبوں کو معیاری طریقے سے بروقت مکمل کرنے کے عزم کا اظہار کیا۔یہ ترقیاتی منصوبے موجودہ حکومت کی مجموعی حکمت عملی کا حصہ ہیں جس کا مقصد نوشہرہ میں عوامی خدمات کی سہولتوں اور شہری سہولتوں کو بہتر بنانا ہے، اور علاقے کی ہمہ جہتی ترقی پر حکومت کی توجہ کو مستحکم کرنا ہے۔
