پرویز احمد
سرینگر //جموں و کشمیر میں 6ماہ کے بعد کورونا متاثرین کی تعداد تقریباً700ہوگئی ہے۔گذشتہ 24گھنٹوں کے دوران جموں و کشمیر میں کورونا وائرس کی تشخیص کیلئے 12ہزار 429ٹیسٹ کئے گئے جن میں ایک مسافر سمیت 697افراد کی رپورٹیں مثبت آئی ہیں۔ اس سے قبل 7فروری کو جموں و کشمیر کورونا وائرس سے 686افراد متاثر ہوئے تھے۔ متاثرین کی مجموعی تعداد 4لاکھ 61ہزار 255ہوگئی ہے۔ اس دوران جموں و کشمیر میں مسلسل دوسرے دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد4763بنی ہوئی ہے۔ محکمہ صحت کی جانب سے فراہم کئے گئے اعداد و شمار کے مطابق منگل کو جموں و کشمیر میں کورونا وائرس متاثرین کی تعداد میں اضافہ کا سلسلہ جاری رہا اور پچھلے24گھنٹوں کے دوران کورونا وائرس سے 697افراد متاثر ہوئے ہیں جن میں جموں صوبے میں281جبکہ کشمیر میں416افراد کی رپورٹیں مثبت آئی ہیں۔
کشمیر میں مثبت قرار دئے گئے سبھی 416افراد مقامی سطح پر رابطے میں آنے کی وجہ سے متاثر ہوئے ہیں۔ کشمیر صوبے کے 416متاثرین میں سرینگر میں سب سے زیادہ 268، بارہمولہ میں 71، بڈگام میں22، پلوامہ میں2، کپوارہ میں 20، اننت ناگ میں 3، بانڈی پورہ میں14، گاندربل میں 10،کولگام میں 6جبکہ شوپیان ضلع میں کسی کی رپورٹ مثبت نہیں آئی ہے۔ وادی میں متاثرین کی مجموعی تعداد 2لاکھ 90ہزار 996ہوگئی ہے۔ اس دوران وادی میں مسلسل20ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2426بنی ہوئی ہے۔ جموں صوبے میں 24گھنٹوں کے دوران 281افراد کی رپورٹیں مثبت قرار دی گئی ہیں جن میں ایک بیرن ریاست سے سفر کرکے جموں پہنچے جبکہ دیگر280افراد مقامی سطح پر رابطے میں آنے کی وجہ سے متاثر ہوئے ہیں۔ جموں صوبے میں مثبت قرار دئے گئے281افراد میںضلع جموں میں147، ادھمپور میں20، راجوری میں16، ڈوڈہ میں40، کٹھوعہ میں 13، سانبہ میں 11، کشتواڑ میں 16، پونچھ میں10، رام بن میں 7 جبکہ ریاسی میں ایک کی رپورٹ مثبت آئی ہیں۔ جموں صوبے میں متاثرین کی مجموعی تعداد 1لاکھ 70ہزار 259ہوگئی ہے۔ اس دوران جموں صوبے میں مسلسل تیسرے دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2337بنی ہوئی ہے۔
ملک میں 14,830نئے معاملات
مزید36 اموات
نئی دہلی// مرکزی وزارت صحت کے مطابق، ایک دن میں 14,830 نئے کوویڈ کیسز سامنے آنے کے ساتھ، ہندوستان میں کورونا وائرس کے انفیکشن کی تعداد بڑھ کر 4,39,20,451 ہوگئی، جب کہ فعال کیسوں کی تعداد گھٹ کر 1,47,512 ہوگئی ہے۔ اعداد و شمار سے پتہ چلتا ہے کہ اس بیماری کی وجہ سے مرنے والوں کی تعداد 5,26,110 تک پہنچ گئی ہے جس میں 36 نئی اموات ریکارڈ کی گئی ہیں۔ اب تک ملک میں 202.5 کروڑ ویکسین کی خوراکیں دی جا چکی ہیں۔
