نئی دہلی//کورونا وبا سے نمٹنے کے لئے حکومت کی ملک گیر مہم کے تحت ملک کے باشندوں کو آگے کی حکمت عملی سے آگاہ کرنے کے لئے وزیر اعظم نریندر مودی منگل کی صبح دس بجے خطاب کریں گے۔
وزیر اعظم کے دفتر نے ایک ٹوئٹ کر تے ہوئے کہا”وزیر اعظم نریندر مودی 14 اپریل کو صبح دس بجے قوم سے خطاب کریں گے“۔
کورونا وبا کے پیش نظر مودی کا قوم کے نام یہ چوتھا خطاب ہوگا۔
مودی نے گزشتہ 24 مارچ کو ہم وطنوں سے مخاطب ہوتے ہوئے کورونا وبا سے نمٹنے کی حکمت عملی کے تحت ملک بھر میں 21 دن کی لاک ڈاون کا اعلان کیا تھا۔ یہ مدت کل یعنی منگل کو ہی ختم ہونی ہے۔
مودی نے گزشتہ ہفتے کورونا وبا سے نمٹنے کی حکمت عملی طے کرنے کے لئے تمام ریاستوں کے وزرائے اعلی کے ساتھ میٹنگ کی تھی۔ اس اجلاس میں لاک ڈاون کی مدت بڑھانے کے سلسل میں تقریبا تقریباً اتفاق ہوگیا تھا۔ وزیر اعظم ملک کے باشندوں کو اس رضامندی کی بنیاد پر کورونا سے لڑنے کے لئے مستقبل میں اٹھائے جانے والے اقدامات اور لاک ڈاون کی مدت بڑھانے یا نہ بڑھانے کے فیصلے سے آگاہ کریں گے۔ اس اجلاس کے بعد کچھ ریاستوں نے اپنے یہاں لاک ڈاون کی مدت 30 اپریل تک بڑھانے کا اعلان پہلے ہی کر دیا ہے۔
اس سے پہلے پارلیمنٹ میں تمام جماعتوں کے رہنماوں کے ساتھ میٹنگ میں بھی مودی نے کہا تھا کہ ملک میں کورونا انفیکشن کے معاملات کی بڑھتی ہوئی تعداد کے پیش نظر ریاستوں، ضلع انتظامیہ اور ماہرین نے لاک ڈاون کی مدت بڑھانے کا مشورہ دیا ہے۔