یو این آئی
نئی دہلی//کانگریس صدر ملک ارجن کھڑگے نے وزیر اعظم نریندر مودی اور ان کی حکومت پر دلت، قبائلی، پسماندہ اور اقلیتی طبقے کے طلبا کی اسکالرشپ ہڑپنے کا الزام لگایا اور کہا کہ جب تک انہیں مناسب تحفظ نہیں ملتا، وہ آگے نہیں بڑھ سکتے ۔ کھڑگے نے وزیر اعظم کو مخاطب کرتے ہوئے ایک سوشل میڈیا پوسٹ میں کہا’’ نریندر مودی جی، آپ کی حکومت نے ملک کے ایس سی، ایس ٹی، او بی سی اور اقلیتی طبقے کے نوجوانوں کے وظائف چھین لیے ہیں۔یہ شرمناک حکومتی اعدادوشمار بتاتے ہیں کہ حکومت نے نہ صرف مستحقین کے تمام وظیفوں میں بڑے پیمانے پر کٹوتی کی ہے بلکہ سال بہ سال اوسطا 25 فیصد کم
فنڈز بھی خرچ کیے ہیں‘‘۔انہوں نے کہا کہ جب تک ملک کے کمزور طبقات کے طلبا کو مواقع نہیں ملیں گے اور ان کی صلاحیتوں کی حوصلہ افزائی نہیں کی جائے گی، ہم اپنے ملک کے نوجوانوں کے لیے روزگار کیسے بڑھا سکیں گے؟ آپ کا ‘سب کا ساتھ، سب کا وکاس کا نعرہ ہر روز کمزور طبقات کے ارمانوں کا مذاق اڑاتا ہے۔
