عظمیٰ نیوز سروس
رائے پور//مرکزی وزیر داخلہ امیت شاہ نے اتوار کے روز کہا کہ وزیر اعظم نریندر مودی نے سردار پٹیل کا نامکمل کام مکمل کیا اور آرٹیکل 370 کو منسوخ کرکے کشمیر کو ہمیشہ کیلئے ہندوستان کے ساتھ جوڑ دیا۔ شاہ نے یہ بات رائے پور میں چھتیس گڑھ پولیس کو صدارتی رنگ پیش کرتے ہوئے کہی۔امیت شاہ نے کہا کہ آج سردار ولبھ بھائی پٹیل کی برسی ہے۔ انہوں نے کہا کہ یہ سردار پٹیل کی بے مثال ہمت اور عزم تھا جس نے قوم کو متحد کیا۔ شاہ نے مزید کہا کہ وزیر اعظم نریندر مودی نے آرٹیکل 370 کو منسوخ کرکے سردار پٹیل کے نامکمل مشن کو پورا کیا، اس طرح کشمیر کو ہندوستان کے ساتھ مستقل طور پر ضم کردیا۔ انہوں نے مزید کہا کہ پوری قوم سردار پٹیل کو تہہ دل سے خراج تحسین پیش کر رہی ہے۔امیت شاہ نے کہا کہ چھتیس گڑھ کی تشکیل کا دیرینہ مطالبہ اٹل بہاری واجپائی نے پورا کیا۔ وزیر داخلہ نے یقین ظاہر کیا کہ وزیر اعظم نریندر مودی کی قیادت میں چھتیس گڑھ 31 مارچ 2026 تک مکمل طور پر نکسل ازم سے آزاد ہو جائے گا۔مرکزی وزیر داخلہ اور تعاون کے وزیر نے کہا کہ وزیر اعظم نریندر مودی کی قیادت میں مرکزی حکومت اور ریاستی حکومت 31 مارچ 2026 تک چھتیس گڑھ سے نکسل ازم کو مکمل طور پر ختم کرنے کے لیے پرعزم ہے۔ انہوں نے نکسلیوں سے تشدد کا راستہ ترک کرنے کی اپیل کی، سماج کے مرکزی دھارے میں شامل ہوں، اور ترقی کی راہ پر آگے بڑھ کر چھتیس گڑھ کی ترقی میں اپنا حصہ ڈالیں۔ انہوں نے مزید کہا کہ وزیر اعظم مودی کی قیادت میں 2047 تک ایک ترقی یافتہ ہندوستان کی تعمیر کے سفر میں چھتیس گڑھ کی اہم شراکت سنہری حروف میں لکھی جائے گی۔
