عظمیٰ نیوز سروس
سرینگر//جموں و کشمیر کے چیف الیکٹورل آفیسر(سی ای او) پی کے پولے نے امید ظاہر کی کہ پولنگ کے دن لائن آف کنٹرول(ایل او سی)کے قریب آنے والے علاقوں میں سرحد پار سے جنگ بندی کی کوئی خلاف ورزی نہیں ہوگی۔پولے نے اتوار کو میڈیا سے بات کرتے ہوئے کہا”ہمیں امید ہے کہ اس بار سرحدی علاقوں میں انتخابات گزشتہ پانچ سالوں سے کنٹرول لائن پر جاری جنگ بندی کی وجہ سے پرامن طریقے سے ہوں گے”۔ پولے، شمالی کشمیر کے بانڈی پورہ میںسسٹمیٹک ووٹرز کی تعلیم اور انتخابی شرکتکے تحت ایک پروگرام میں شرکت کر رہے تھے۔انہوں نے کہا کہ ایل او سی کے قریب آنے والے علاقوں میں پہلے سے ہی ایک منصوبہ بنا چکے ہیں اور اگر بانڈی پورہ ضلع میں رازدان پاس خراب موسم یا کسی اور وجہ سے بند رہتا ہے تو ہندوستانی فضائیہ پولنگ میٹریل، ای وی ایم مشینیں اور پولنگ عملہ لے جائے گی۔پولے نے مزید کہا، “اگر سرحد پار سے یہاں پولنگ کی سرگرمیوں میں خلل ڈالنے کی کوئی کوشش ہوتی ہے تو اس کے لیے بھی ایک منصوبہ شروع کر دیا گیا ہے”۔انہوں نے کہا کہ عام طور پر گزشتہ پانچ سالوں سے سرحدوں پر جنگ بندی ہے اور ایسا نہیں لگتا کہ سرحد پار سے یہاں پولنگ میں خلل ڈالنے کی کوئی کوشش کی جائے گی۔انہوں نے مزید کہا کہ “ہم پوری طرح تیار ہیں کہ پولنگ پرامن طریقے سے ہو اور اگر کوئی کوشش ہوئی تو پولنگ کرائی جائے گی”۔انہوں نے کہا کہ SVEEP کے دوران لوگوں کے خاص طور پر نوجوانوں کے جوش و خروش کو دیکھنے کے بعد، ووٹروں کی ایک بڑی تعداد 20 مئی کو بانڈی پورہ میں اپنے حق رائے دہی کا استعمال کرنے کے لیے بھاری تعداد میں باہر آئے گی۔
