کشمیر میں موسم خشک

عظمیٰ نیوز سروس

سرینگر// وادی کشمیر میں گرچہ موسم خشک ہے تاہم بیشترعلاقوں میں شبانہ درجہ حرارت مسلسل نقطہ انجماد سے نیچے درج ہونے کی وجہ سے ٹھٹھرتی سردیوں کا زور جاری ہے ۔محکمہ موسمیات کے ایک ترجمان کے مطابق سری نگر میں کم سے کم درجہ حرارت منفی0.5 ڈگری سینٹی گریڈ ریکارڈ ہوا ہے ۔سری نگر میں 15 نومبر کی رات اب تک کی سرد ترین رات ریکارڈ ہوئی ہے جب شبانہ درجہ حرارت منفی2.4 ڈگری سینٹی گریڈ ریکارڈ ہوا تھا۔ پہلگام میں کم سے کم درجہ حرارت منفی2.5 ڈگری جبکہ گلمرگ میں 1.0،سرحدی ضلع کپوارہ میںمنفی1.2 ڈگری سینٹی اور قاضی گنڈ میں کم سے کم درجہ حرارت منفی1.4 ڈگری سینٹی گریڈ ریکارڈ ہوا ہے ۔محکمہ موسمیات کے مطابق وادی میں ماہ رواں کے اختتام تک موسم مجموعی طور پر خشک رہنے کا امکان ہے ۔انہوں نے کہا کہ وادی میں آنے والے دنوں کے دوران درجہ حرارت میں مزید گراوٹ متوقع ہے ۔