سرینگر//حریت (گ) چیئر مین سید علی گیلانی نے ریاست میں آزادی پسند قائدین، اُن کے اہل خانہ ، کارکنان اور نوجوانوں کے خلاف وسیع پیمانے پر کریک ڈاؤن پر شدید ردّعمل ظاہر کرتے ہوئے کہا کہ بھارت اصولی طور جموں کشمیر میں اپنی جنگ ہار چکا ہے اور اب وہ ایسے اوچھے ہتھکنڈوں سے یہاں کے عوام کو بدترین انتقام گیری کا نشانہ بنارہا ہے۔ انہوں نے امیرِ جماعت اسلامی جموں کشمیر ڈاکٹر حمید فیاض کو پی ایس اے کے تحت وادی سے باہر منتقل کرنے ، جماعت اسلامی جموں کشمیر، جموں کشمیر لبریشن فرنٹ اور عام نوجوانوں کو گرفتار کرنے کی کارروائیوں کی مذمت کرتے ہوئے کہا کہ دنیا میں ہر جگہ لوگ اپنے خیالات اور جذبات کا اظہار جمہوری طریقے پر کرتے رہتے ہیں، البتہ جموں کشمیر دنیا میں ایسا واحد خطہ ہے جہاں لوگوں کو ظلم وجبر، بربریت، سفاکیت، زیادتیوں اور ناجائز غاصبانہ قبضہ کے خلاف آواز اٹھانے کی اجازت نہیں دی جارہی ہے۔ حریت رہنما نے کہا کہ بھارت سیاسی اہمیت کے ایام ریاست کے عوام کے لیے عذاب وعتاب کا روح فرسا پیغام لیکر آتے ہیں۔
پورے بھارت میں جہاں الیکشن کی گہما گہمی زوروں پر ہے اس خطہ بدنصیب میں ملٹری آپریشن کو کامیاب بنانے کے لیے قید خانوں اور انٹروگیشن سینٹروں کے دروازے کھولے جاتے ہیں۔انہوں نے کہا کہ بھارتی حکام ہر آواز کو آہنی ہاتھوں سے دباکر یہاں قبرستان کی خاموشی طاری کرنا چاہتا ہے۔
