یو این آئی
سرینگر// شہری ہوابازی کے وزیر رام موہن نائیڈو کا کہنا ہے کہ جس طرح پورا ملک پہلگام حملے کی مذمت میں ایک ساتھ کھڑا رہا اسی طرح جموں وکشمیر کی معیشت کے ساتھ کھڑے رہنے کا وقت آگیا ہے ۔انہوں نے کہا’کشمیر محفوظ ہے ، جتنا پہلے خوبصورت تھا، اتنا خوبصورت آج بھی ہے ، سیاحوں کو یہاں واپس لوٹ آنا چاہئے‘۔موصوف نامہ نگاروں کے ساتھ بات کررہے تھے۔ انہوں نے اپنے دورے کے دوران سری نگر ہوائی اڈے پر آپریشنز کا جائزہ لیا اور اس کے بعد سرینگر کے پولو ویو مارکیٹ کا دورہ کرکے وہاں لوگوں کے ساتھ بات چیت بھی کی۔ شعبہ سیاحت کی بحالی کے بارے میں پوچھے جانے پر موصوف وزیر نے کہا ‘میں ایک طرح سے شعبہ سیاحت کی بحالی کے لئے ہی آیا ہوں، کشمیر محفوظ ہے ، جتنا خوبصورت پہلے تھا، اتنا آج بھی ہے ، سیاحوں کو یہاں آنا چاہئے ‘۔انہوں نے کہا’جس طرح پہلگام حادثے کے بعد ہم سب ایک ساتھ کھڑے رہے اسی طرح ہمیں آج جموں وکشمیر کی معیشت کے لئے ایک ساتھ کھڑا رہنا ہے‘۔ان کا کہنا تھا’میں آندھرا پردیش سے آتا ہوں، لوگ کشمیر سے محبت کرتے ہیں اور چھٹیاں گذارنے کے لئے کشمیر ہی آتے ہیں‘۔ نائیڈو نے کہا کہ ملک بھر کے تمام فلائٹ آپریشنز کو بحال کر دیا گیا ہے ان میں سرینگر بھی شامل ہے‘۔انہوں نے کہا کہ شہری ہوا بازی کی وزارت ان تمام کوششوں کی حمایت کرنے کے لیے پوری طرح پرعزم ہے جو خطے کی معیشت میں مدد دے سکتی ہیں۔ان کا کہنا تھا’ہم مدد کرنے کے لیے ہر ممکن کوشش کریں گے سیاحوں کو واپس لانا اور معمول کی زندگی بحال کرنا بہت ضروری ہے ، اور پروازیں دوبارہ شروع کرنا اس سمت میں پہلا قدم ہے‘۔
