کشمیر اکنامک الائنس نے بھی کال دیدی

سرینگر//کشمیر اکنامک ا لائنس نے6 اگست کوآئین ہند کی دفعہ35اے کی شنوائی کے روز مکمل ہڑتال کا اعلان کرتے ہوئے اقوام متحدہ کے فوجی مبصرین کے دفتر تک مارچ کر کے یاداشت پیش کرنے کا اعلان کیا ہے۔سرینگر میں ایک پریس کانفرنس کے دوران تجارتی و کاروباری انجمنوں کے مشترکہ اتحاد کشمیر اکنامک الائنس کے چیئرمین محمد یوسف چاپری نے کہا کہ کشمیر کی خصوصی حیثیت کو تحفظ فراہم کرنے کیلئے ہر قربانی پیش کریں گے۔دفعہ35اے کو شہ رگ قرار دیتے ہوئے انہوں نے کہا کہ یہ کسی مخصوص مذہب،جماعت،خطے یا لسانی طبقے سے جڑامسئلہ نہیں بلکہ ریاست کے عوام کا مسئلہ ہے،جس سے انکی سیاسی و معیشتی تقدیر جڑی ہوئی ہے۔ چاپری نے کہا کہ ریاست کی وحدت اور انفرادی حیثیت کی بقاء کیلئے تمام جماعتوں کو مشترکہ طور پر ان افراد کا مقابلہ کرنا چاہیے،جو ریاست کے بکھرائو میں لگے ہوئے ہیں۔محمد یوسف چاپری نے مشورہ دیا کہ اس سلسلے میں تمام سیاسی،تجارتی انجمنوں اور قانونی ماہرین کو آواز بلند کرنی چاہیے۔انہوں نے کہا کہ ایسی کسی بھی کوششوں کو ناکام بنانے کیلئے وہ صف آرہ ہوں گے جس میں ریاست کی خصوصی پوزیشن کو متاثر ہونے کا خطرہ لاحق ہو۔ دفعہ35اے کو بنیادی مسئلہ کی روح قرار دیتے ہوئے انہوں نے  کہاکہ کسی بھی صورت میں اس کو مسخ ہونے کی اجازت نہیں دی جائے گی۔انہوں نے6اگست کو مکمل ہڑتال کی کال دیتے ہوئے اس روز اقوام متحدہ کے فوجی مبصر کے دفتر تک احتجاج ی مارچ کر کے انہیں یاداشت پیش کرنے کا اعلان کیا۔چاپری نے کہاکہ اگر آرٹیکل35Aکے ساتھ کوئی چھیڑ چھاڑ کی گئی تو مقامی طور پر ایک بڑی ایجی ٹیشن شروع کی جائے گی،جس کے سنگین نتائج برآمد ہونگے۔انہوں نے کہا کہ مرکزی حکومت اور گورنر انتظامیہ کو اس سلسلے میں سوچ سمجھ کر کوئی بھی قدم اٹھانا چاہیے۔اس موقعہ پر کشمیر اکنامک الائنس شریک چیئرمین فاروق احمد ڈار نے الزام عائد کیا کہ دفعہ370اور دفعہ35اے کے خلاف سازشیں رچائی جا رہی ہیں۔انہوںنے کہا کہ یہ معاملہ کشمیریوں کی سیاسی تقدیر سے جڑا ہوا ہے،اور اس پر ضرب لگانے کی اجازت نہیں دی جائے گی۔فاروق احمدڈار نے کہا کہ پہلے ’’جی اسی ٹی‘‘ کا نفاذ عمل میں لاکر ایک سیڑھی تیار کی گئی،اور اب ریاست کی خصوصی حیثیت کو زک پہنچانے کی کوشش کی جا رہی ہے۔انہوں نے کہا کہ اصل میں بی جے پی،زعفرانی بریگیڈ کے اس منصوبے پر عمل پیرا ہے،جس کے تحت جموں کشمیر کی خصوصی حیثیت پر ضرب لگائی جا رہی ہے۔پریس کانفرنس سے کشمیر اکنامک الائنس کے ترجمان اعلیٰ محمد صدیق رونگہ، نائب چیئرمین اعجاز شہدار،کشمیر تریڈرس اینڈ مینو فیکچرس فیڈریشن کے سابق صدر محمد صدیق بقال ساوتھ سٹی ٹریڈرس ایسو سی ایشن کے صدر صوفی محی الدین اور حاجی نثار احمد سمیت دیگر ٹریڈ لیڈران بھی موجود تھے۔