بلا شبہ کشمیر کی روایتی اور قدیم گھریلو صنعتوں باالخصوص قالین بافی،شال بافی،پشمینہ سازی،ریشم سازی،نمدہ بافی ،ووڈ کارونگ اور پیپر ماشی وغیرہ سے جہاں کشمیریوں کو روز گار مہیا ہوا کرتا تھا وہیں ان صنعتوں کی بیرونِ ریاستوںمیں برآمدگی سے بھاری آمدن ہونے کے ساتھ ساتھ کشمیرپورے ملک اور دنیا بھر میں شہرت رکھتا تھا۔لیکن افسوس! کشمیر کی یہ قدیم صنعتیں اب مکمل طور زوال پذیر ہوگئی ہیں۔ان صنعتوں کو زوال پذیری میں نہ صرف یہاں کی حکومتوں کا غیر ذمہ دارانہ رول کار فرما رہا بلکہ خود یہاں کے لوگوں کا بھی بڑا ہاتھ رہاہے۔جو لوگ دستکاریاں کرتے تھے یا دستکاریوں کے کاروبار سے منسلک تھے،وقت گذرنے کے ساتھ ساتھ انہوں نے دوسرے آسان دھندے اختیار کئےاور جو لوگ ان صنعتوں کو زندہ رکھنا چاہتے تھے،وہ بھی حکومتوں کی چشم پوشی اورعدم توجہی سے لاچار ہوکر دوسرے کام دھندوں سے وابستہ ہوگئےاور اس طرح کشمیر کی قدیم دستکاریاں محض نام کی باقی رہ گئیں۔چنانچہ کشمیری دستکاریوں کے نام پر امرتسر،جودھپور،اُتر پردیش اور کچھ دوسری ریاستوں میں قالین بافی ،شال بافی ،ووڈ کارونگ ا ور پیپر ماشی کو جس انداز سے فروغ ملا ،وہ کشمیری دستکاریوں کی زوال پذیری کے تابوت میں آخری کیل ثابت ہوا۔کیونکہ بیرون ریاستوں میں کشمیری دستکاریوں کے نام جو چیزیں تیار کی گئیں اور کی جارہی ہیں،اُن کی تجارت نہ صرف پورے ملک بلکہ بیرونِ ممالک میں کشمیری دستکاریوں کے نام پر تا ایں دم شدو مد سے جاری ہے۔بے شک کشمیری دستکاریوں کی زوال پذیری میں کشمیریوں کا رول حد درجہ افسوس ناک رہا ہے،ہر شعبہ کی طرح اس شعبے کو بھی ناپاک اور ناصاف بنانے میں کوئی کسر نہیں چھوڑی۔ایک طرف جہاں دستکاریوں سے وابستہ بڑے بڑے تاجر اور کارخانہ داراِن دستکاریوں کی کوالٹی اور معیار کوگھٹاتے رہے،نقلی مال بناتے رہے اورنمبر دو کاروبار کے نام پر عام لوگوں سے سیلز ٹیکس وصول کرکے اُسے ہڑپ کرتے رہے تو دوسری طرف یہ کاروباری حلقے ان گھریلودستکاریوں سے منسلک طبقہ، محنت کش کاریگروںاور ہتھکڑوں کا بُری طرح استحصال کرتے رہےاور اُنہیں ،اُن کی اُجرت کا ایک تہائی حصہ بھی نہیں دیتے رہے،جس کے نتیجے اُس محنت کش کاریگر طبقے نے اپنے روٹی روزی کا بندوبست کرنےکے لئے مجبوراً دوسرے کام دھندے شروع کردیئے ۔گویا عالمی شہرت یافتہ کشمیری دستکاریوں کو کشمیریوں نے محض اپنی خود غرضی ،لالچ اور فریب کاریوں سے داغدار بناکر روبۂ زوال بنادیا۔اسی طرح وادی کی زعفران صنعت کو بھی بے ضمیر تاجروں اور کاروباری حلقوں نے مکروہ پالیسی کے تحت ایرانی زعفران کے علاوہ نقلی زعفران کو کشمیری زعفران کے طور پر فروخت کرکے داغدار کردیا۔وادیٔ کشمیر کی یہ بدقسمتی رہی ہے کہ اِسے ہر معاملے میں تباہ و برباد کرنے اور پسماندہ بنانے میںغیروں کا اُتنا زیادہ رول نہیں رہا ،جتنا کہ اپنوں کا ہاتھ رہا ہے۔آج بھی صورت حال یہی ہے،سرکاری محکمہ ہو یا غیر سرکاری،ان اداروں میں کام کرنے والے بیشتر لوگ خود ہی ان اداروں کو لوٹ کر تباہ کررہے ہیںاور ذاتی اغراض و مقاصد کے تحت ہر وہ شیطانی چال چل رہےہیں جو ان اداروں کے زوال پذیری کی وجہ بن رہے ہیں۔یہ بھی بتایا جاتا ہے کہ محکمہ ایمپوریم اور ہینڈی کرافٹس سے وابستہ بعض حکام اور افسران نے وہ طرزِ عمل اپنایاتھا ،جس سےبیرون ریاستوں اور بیرون ممالک میں وادی کی بچی کچھی قدیم صنعتوںکی کوالٹی پر ٹھپہ لگ گیا ہے اور صورت حال یہاں تک پہنچ گئی ہے کہ اب وادی میں پیدا شدہ یا تیار شدہ کسی بھی اصلی چیز کو نقل کی نگاہ سے دیکھا جارہا ہے۔ ملک کی کسی بھی ریاست میں جب کوئی تجاری نمائش ہوتی ہے تو وہاں پر قائم کئے جارہے کشمیری اِسٹالوں پر زیادہ تر مال دوسری ریاستوں میں تیار شدہ ہوتا ہے، جنہیں کشمیر برانڈ کے نام پر بیچا جاتا ہے۔لوگ چونکہ لالچ میں گرفتار ہیں اور نام نہاد ترقی کے لئے سب کچھ کر بیٹھتے ہیں،بُرائیوں کو بُرا نہیں مانتےہیںاور اس بات سے بالکل غافل ہوجاتے ہیں کہ اس نقلی کاروبار سے اگر چہ کچھ لوگ مالا مال ہورہے ہیں لیکن اس بے ایمانہ اور دھوکہ دہی کے طرزِ عمل سے کاروباری زندگی میں جو گندگی و غلاظت پھیل گئی ہے ،اس نے پورے معاشرے کو داغدار بنا دیا ہے۔اب جبکہ جموں و کشمیر کی موجودہ انتظامیہ نے کشمیر کی دستکاریوں کو زوال پذیری سے نکالنے اور انہیں اپنے اصل مقام پر بحال کرنے کے لئے اقدامات اٹھانے کا فیصلہ لیا ہے ،انتہائی قابل ِقدراور خوش آئند بات ہے ۔تاہم انتظامیہ کےان فیصلوںکے واقعی بہتر اور مثبت نتائج برآمد ہوں گے،اس کے متعلق قبل از وقت کچھ کہا نہیں جاسکتا۔
کشمیری دستکاریاںاورہمارامعاشرہ
