کشمیریوں کیخلاف حملے ،سپریم کورٹ میں سماعت آج

نئی دہلی// سپریم کورٹ ملک  میں کشمیریوں پر ہونے والے مبینہ حملوں پر لگام لگانے سے متعلق عرضی پر جمعہ کو سماعت کرے گا۔عرضی گزار طارق عدیب کی طرف سے سینئر وکیل کولن گونزالوس نے چیف جسٹس رنجن گوگوئی ، جج ایل ناگیشور راو اور جج سنجیو کھنہ کی بنچ کے سامنے معاملہ کا ذکر کیا۔ انہوں نے دلیل دی کہ یہ معاملہ نہایت سنگین ہے اور اس پر فوری طورپر سماعت کی جانی چاہئے ۔جج گوگوئی نے عرضی کو سماعت کیلئے کل درج فہرست کرنے کا یقین دلایا۔عرضی گزار نے مرکزی حکومت کے علاوہ آٹھ ریاستوں جموں وکشمیر، اتراکھنڈ، اترپردیش، میگھالیہ، چھتیس گڑھ اور مغربی بنگال کو فریق بنایا ہے ۔عرضی گزارنے کہا ہے کہ پلوامہ میں ہوئے دہشت گردانہ حملے کے بعد ملک کے مختلف حصوں میں واقع تعلیمی اداروں میں پڑھنے والے کشمیری نوجوان لڑکے ۔لڑکیوں پر حملے کئے جارہے ہیں۔