عاصف بٹ
کشتواڑ//اتوار کی صبح بالائی و میدانی علاقوںمیں شروع ہوئی بارشوں کے سبب عام زندگی بری طرح مفلوج ہوکررہ گئی۔ تفصیلات کے مطابق اتوار کی صبح کشتواڑ ضلع کے بالائی و میدانی علاقوں میں شروع ہوئی موسلادھار بارشوں کا سلسلہ دوپہر تک جاری رہے جسکے بعد موسم میں بہتر آئی۔ بارشوں کے سبب متعدد مقامات پر پانی جمع ہوگیا جبکہ سڑکیں زیرآب آئیں۔ بارشوں سے جہاں لوگوں نے گرمی سے راحت کی سانس لی وہی متعدد مقامات پر بارش نے تباہی مچائی۔ چھاترو کے سگدی علاقے کے بالائی مقام پر بادل پھٹنے کاواقعہ پیش آیا جس سے سگدی نالےمیں پانی کی سطح میں اضافہ ہوا جبکہ متعدد مقامات پرپن چکیوں،فصل و زمین کو نقصان پہنچا ۔انتظامیہ نے عوام سے ندی نالوں کے قریب نہ جانے کی اپیل کی ہے ۔ادھرمیدانی علاقوں میں موسلادھار بارشوں سے عام زندگی مفلوج ہوکررہ گئی۔ بارشوں کے سبب سڑکیں زیرآب آئیںجبکہ گلی کوچوں میں بھی پانی جمع ہوگیا جس سے عوام کو سخت مشکلات کا سامنا کرنا پڑا۔
ڈوڈہ میں تازہ بارشیں | گرمی میں کمی، پانی کی سطح میں قدرے اضافہ
اشتیاق ملک
ڈوڈہ //ڈوڈہ ضلع میں ہوئی تازہ بارشوں کے بعد درجہ حرارت میں بہتری آئی ہے اور لوگوں نے بھی راحت کی سانس لی۔اطلاعات کے مطابق پچھلے دو روز سے جاری ڈوڈہ ضلع کے بالائی علاقوں میں وقفے وقفے سے ہلکی بارش ہوئی جس کے بعد گرمی کی شدت میں کمی آئی ہے اور ندی نالوں میں پانی کی سطح میں قدرے اضافہ ہوا ہے۔واضح رہے کہ پچھلے کئی ہفتوں سے چل رہی خشک سالی سے ڈوڈہ ضلع کے شہر و گام میں پینے کے صاف پانی میں کمی آئی تھی اور زرعی شعبہ بری طرح متاثر ہوا ہے جبکہ کئی ندی، نالے، جھیلیں و چشمے گئے ہیں۔بارشوں کی کمی کے باعث پھلوں و سبزیوں کی پیداوار بھی متاثر ہوئی ہے جس کے نتیجے کسان و زمیندار پریشان ہوئے ہیں۔
