عظمیٰ یاسمین
تھنہ منڈی// ملہت درہال کی عوام نے پی ایم جی ایس وائی کے تحت بننے والی کسیاں تا درہال رابطہ کی مرمت اور بلیک ٹاپنگ کا مطالبہ کیا گیا ہے۔ انہوں نے کہا کہ یہ سڑک ڈی ڈی سی ممبر اقبال ملک کی کاوشوں سے تعمیر کی گئی تھی اور اس سڑک پر بہترین کام ہوا تھا لیکن گزشتہ سال مون سون بارشوں اور سیلاب کی وجہ سے یہ سڑک بری طرح متاثر ہوئی تھی جگہ جگہ پر کھڈے پڑ گئے تھے، نالیاں بند ہو گئی تھیں اور پانی کے تیز بہاؤ کی وجہ سے سڑک دونوں اطراف سے ٹوٹ پھوٹ کا شکار ہو گئی تھی۔ اس سلسلے میں مکینوں نے بتایا کہ چونکہ گورنمنٹ کی گائڈ لائن کے مطابق اس سڑک کی دیکھ بال پانچ سال تک اسی ٹھیکیدار کے پاس ہے لہٰذا ہم نے بہت بار ایڈمنسٹریشن تک بات پہنچائی کہ ہماری اس سڑک کو اچھے طریقے سے مرمت کیا جائے لیکن متعلقہ محکمہ نے اس جانب کوئی توجہ نہیں دی۔ اس موقع پر سماجی کارکن مرتضی مرزا اور دیگر کئی لوگوں نے میڈیا کو بتایا کہ اس گھر سڑک پر گہرے کھڈے پڑنے کی وجہ سے گاڑیاں ٹوٹ چکی ہیں۔ انہوں نے مزید کہا کہ یہاں کے نوجوانوں نے بینکوں سے لاکھوں روپے کا قرضہ لے کر گاڑیاں خریدی تھیں لیکن سڑک کی خستہ حالی کی وجہ سے تمام گاڑیاں ٹوٹ پھوٹ کا شکار ہو چکی ہے جس سے ان کا کروڑوں کا نقصان ہوا ہے۔ انہوں نے مزید کہا کہ سڑک کی بری حالت ہے اور ڈیپارٹمنٹ محو خواب ہے۔ انہوں نے ضلع انتظامیہ سے مطالبہ کرتے ہوئے کہا کہ کسیاں تا درہال تھنہ منگ سڑک کا کام جلد از جلد شروع کیا جائے اور جو سڑک پی ایم جی ایس وائی کے تحت بنی تھی اسکی مرمت کا کام بھی جلد از جلد شروع کیا جائے۔ انھوں نے انتباہ دیتے ہوئے کہا کہ اگر اس سڑک کی ضروری مرمت کا کام جلد از جلد شروع نہ کیا گیا تو مستقبل قریب میں ایک بڑا احتجاج کیا جائے گا جس کی ساری ذمہ داری انتظامیہ کی ہو گی۔
