بنگلورو // کرناٹک میں حکومت کی تشکیل کو لے کر جے ڈی ایس اور کانگریس کے درمیان تبادلہ خیال جاری ہے۔ ذرائع کے مطابق دونوں پارٹیوں میں وزارتوں کی تقسیم پر غو ر وخوض کیا گیا۔ جے ڈی ایس لیڈر کمار سوامی بدھ کو وزیر اعلی کے عہدہ کا حلف لیں گے۔ وہیں ذرائع کے مطابق کمار سوامی کے ساتھ کانگریس کے 17-20 وزرا جبکہ جے ڈی ایس کے 10 سے 13 وزرا حلف لے سکتے ہیں۔ذرائع کے مطابق اس میٹنگ میں نائب وزیر اعلی کے نام پر بھی تبادلہ خیال کیا گیا۔ انہوں نے بتایا کہ ریاست میں دو وزرائے اعلی بنائے جاسکتے ہیں۔ کانگریس کی طرف سے ریاستی صدر جی پرمیشور کے علاوہ ریاست میں گزشتہ دنوں ہوئی سیاسی رسہ کشی کے دوران پارٹی کے سنکٹ موچک رہے ڈی کے شیو کمار کا نام اس عہدہ کیلئے آگے بڑھایا جارہا ہے۔وہیں جے ڈی ایس کسی مسلمان کو نائب وزیر اعلی بنانا چاہ رہی ہے۔ اس کے علاوہ کانگریس لیڈر اور ریاست کے سب سے سینئر ممبر اسمبلی ڈی وی دیش پانڈے کو اسمبلی اسپیکر کا عہدہ بھی دیا جاسکتا ہے۔اس درمیان کمار سوامی دہلی جاکر کانگریس صدر راہل گاندھی اور سونیا گاندھی سے ملاقات کریں گے۔ کمار سوامی نے کہا کہ کل میں دہلی جارہاہوں ، میں راہل اور سونیا گاندھی جی سے ملاقات کرنا چاہتا ہوں۔ اس کے ساتھ ہی انہوں نے کہا کہ وہ 24 گھنٹوں میں اپنی اکثریت ثابت کردیں گے۔
کرناٹک میں حکومت کی تشکیل پر غور، 2نائب وزرائے اعلی کا امکان
