کرس گیل کی طویل عرصہ بعد ویسٹ انڈین اسکواڈ میں واپسی

کنگسٹن/ بھارت کے خلاف واحد ٹی 20 میچ کیلیے ویسٹ انڈیز کے جارح مزاج اوپنر کرس گیل کی طویل عرصہ بعد ٹیم میں واپسی ہوئی ہے۔کرکٹ بورڈ کے ساتھ مالی تنازع کے باعث اوپنر طویل عرصہ سے قومی ٹیم سے باہر تھے، سلیکٹرز نے ایک مرتبہ پھر کرس گیل پر اعتماد کرتے ہوئے 9 جولائی کو بھارت کے خلاف واحد ٹی 20 میچ کے لئے طلب کیا ہے، اوپنر پہلی مرتبہ اپنے ہوم گراونڈ سبینا پارک کنگسٹن میں ٹی 20 میچ کھیلیں گے، انہیں آؤٹ آف فارم لینڈل سیمنز کی جگہ ٹیم میں شامل کیا گیا ہے۔کرس گیل اس سے قبل ٹی ٹوئنٹی ورلڈ کپ 2016 فائنل میں انگلینڈ کے خلاف آخری مرتبہ ویسٹ انڈیز کی جانب سے کھیلے تھے جس کے بعد وہ مسلسل ٹیم سے باہر ہیں۔ کرس گیل ٹی 20 انٹرنیشنلز میں ویسٹ انڈیز کے سب سے کامیاب بیٹسمین ہیں، انہوں نے مختصر فارمیٹ میں 35.32 کی اوسط سے 1519 رنز بنا رکھے ہیں جس میں 2 سنچریز اور 13نصف سنچریز شامل ہیں۔ کرکٹ ویسٹ انڈیز کے چیئرمین آف سلیکٹرز کورٹنی برآن نے کہا کہ کرس گیل کو ٹی 20 اسکواڈ میں واپسی پر خوش آمدید کہتے ہیں، وہ اس فارمیٹ کے منجھے ہوئے بیٹسمین ہیں، ان کی شمولیت سے ٹاپ آرڈر بیٹنگ مستحکم ہو گی۔ویسٹ انڈیز کے 13 رکنی اسکواڈ میں کارلوس بریتھ ویٹ کپتان، سیموئل بدری، رونس فورڈ بیٹن، کرس گیل، ایون لیوس، جیسن محمد، سنیل نارائن، کیرن پولارڈ، رومن پاول، مارلن سیموئلز، جیروم ٹیلر، کیڈوک والٹن اور کیسرک ولیم شامل ہیں۔دریں اثنا ہندوستانی کرکٹ ٹیم کا ویسٹ انڈیز دورہ اب تک تفریح بھرا رہا اور اس نے گذشتہ میچ آسانی سے جیت کر برتری بھی حاصل کرلی لیکن چوتھے ون ڈے میں ٹیم چھوٹے ہدف کا تعاقب بھی نہ کر سکی جس کے بعد اسے جمعرات کو سبینا پارک میں کھیلے جانے والے فیصلہ کن میچ میں سیریز پر گرفت مضبو ط کرنے کیلئے ایڑی چوٹی کا زور لگانا ہوگا