کتوں نے انسانوں کا جینا دوبھر کر دیا

 سرینگر//سونہ وار ،اندرا نگر اور ملحقہ علاقوں میں آوارہ کتوعوں نے راہ چلتے لوگوں کا قافیہ حیات تنگ کیا ہوا ہے اور بلدیاتی اداروں کی جانب سے آوارہ کتوں کو قابو کرنے کیلئے کاروائی عمل میں نہ لانے کی وجہ سے لوگوں کی تشویش میں دن بدن اضافہ ہوتا جا رہا ہے ۔مقامی لوگوں کے مطابق درجنوں آوارہ اور بھاری بھر کم کتے جھنڈ کی صورت میں بستیوں میں موجود کوڑے دانوں اور جے پی پنتھ ہسپتال کے آس پاس موجود رہتے ہیں جن کی وجہ سے ان علاقوں میں کوئی بھی شخص اکیلے چلنے کی جرات ہی نہیں کرسکتا۔انہوں نے کہا کہ سکولی بچے ٹیوشن سنٹر جانے اور آنے کے دوران انتہائی مشکلات کا شکار ہوجاتے ہیں کیونکہ آج تک کئی بچوں کو آوارہ کتوں نے کاٹ کھایا ہے ۔بلال احمد نامی شہر ی نے بتایا کہ علاقہ میںکوئی بھی خاتون یا بچہ اکیلے جانے کی کوشش بھی نہیں کرسکتا کیونکہ ہر بار انہیںکتوں کے حملوں کا خطرہ رہتا ہے ۔انہوں نے کہا کہ آوارہ کتوں نے انسانوں کا جینا دوبھر کر دیا ہے بار بار بلدیاتی اداروں کو آوارہ کتوں کو قابو کرنے کے بارے میں لوگوں نے آگاہ کیا تاہم بلدیاتی اداروں کی جانب سے انہیں قابو کرنے کیلئے کوئی کاروائی عمل میں لائی جا رہی ہے ۔شبیر احمد نے بتایا کہ بچہ ہسپتال کے قریب سڑک کے کنارے جمع کوڑا کرکٹ کے ارد گرد درجنوں آوارہ کتے منڈلاتے ہوئے نظر آتے ہیں اور جونہی لوگ یا سکوٹر سوار وہاں سے گزر جاتے ہیں آوارہ کتے ان پرحملہ آور ہوتے ہیں اور آج تک درجنوں سکوٹر سوار حادثوں کا شکار بھی ہوئے۔علاقہ کے لوگوںنے مطالبہ کیا ہے کہ انسانوں کو کتوں سے نجات دلانے کیلئے ٹھوس بنیادوں پر اقدامات اٹھائے جائیں تاکہ لوگوںکو راحت نصیب ہو سکے ۔