سوال:-روزے کے متعلق جوعمومی مسائل کثیر الوقوع ہیں ، براہ کرم اپنے مفیدکالم میں خود ہی انتخاب کرکے ضرور شائع کریں ۔ اہم مسائل ضرور لکھیں ۔
اعجاز احمد …بانڈی پورہ
روزے کے اہم مسائل
جواب:-روزہ ہرمسلمان مرد عورت پر فرض ہے، بشرطیکہ وہ بالغ ہو ۔ روزہ کو فرض تسلیم کرنااور اس کو خدا کا اور اس کے نبی کا لازم کردہ حکم اعتقاد رکھنا ضروری ہے۔ اس لئے جو شخص رمضان کی یا روزہے کی توہین کرے ، تو وہ شخص ایمان سے محروم ہوسکتاہے ۔مثلاً کوئی یہ کہے ،ہم کو بھوکا پیاسا رکھنے سے اللہ کو کیا ملے گا ، یا روزہ اس وقت فرض تھا جب لوگوں کے پاس کھانے پینے کو کچھ نہ تھا،اس طرح کے جملے بول دینے سے مسلمان کا ایمان ختم ہوجاتاہے۔روزہ کے فرض ہونے کا عقیدہ رکھنا اور پھر اس کو ادا کرنا دونوں لازم ہیں۔یعنی عقیدہ وعمل دو الگ الگ امور ہیں اور دونوں ضروری ہیں صرف ایک خاص صورت میں روزہ رکھنا منع ہے اوروہ یہ کہ جب کوئی خاتون حیض یا نفاس کی حالت میں ہو تو اس کے لئے روزہ رکھنا منع ہے ۔ یعنی وہ روزہ رکھنا بھی چاہے تو اجازت نہیںاور اگر وہ رکھے گی تو گنہگار ہوگی ۔ حیض ونفاس کی وجہ سے جتنے روزے چھوٹ جائیں ان کی قضا وہ رمضان کے بعد کرے گی اور وقفہ وقفہ سے قضا کرنے کی اجازت ہے ۔ مریض ، مسافر ، حاملہ عورت ، دودھ پلانے والی خاتون ، اسی طرح جس شخص کو بار بار بے ہوشی ہوتی ہو ان افراد کو روزہ چھوڑنے کی اجازت ہے جب مریض صحت یاب ہوجائے اور جب مسافر مقیم ہوجائے ۔اسی طرح حاملہ خاتون کا جب وضع حمل ہوجائے اور دودھ پلانے والی کا بچہ جب غذا کھانے لگے تو اب ان کو اُن فوت شدہ روزوں کی قضا کرنا لازم ہوگا ۔ روزہ مؤخر کرنے کی رخصت ہے۔
ایسا بوڑھا شخص یا اتنا کمزور فرد جس کےا صحت یاب اور روزے کے قابل ہونے کی اب کوئی امید ہی نہ ہو اور یہ یقین ہے کہ بقیہ ایام حیات اسی حالت میں گذاریں گے، جس کو فقہ کی اصلاح میں شیخ فانی کہتے ہیں، تو اسے اس کی اجازت ہے کہ روزہ چھوڑ دے اور ہر روزے کے عوض میں ایک صدقہ فطر کے بقدر رقم صدقہ کردے ۔ یہ رقم یکمشت دینا بھی درست ہے ۔رمضان کے روزے کے لئے ہر روزے کی الگ الگ نیت کرنا ضروری ہے ۔ نیت کے لئے دل میں ارادہ کرنا یا سحری کھانا بھی کافی ہے ۔ اگرزبان سے نیت کے الفاظ پڑھے تو یہ بھی بہتر اور افضل ہے ۔ اگر کسی نے نیت نہ کی یعنی روزہ کھنے کا ارادہ نہ کیا اور پورے دن بغیر کھائے پئے رہا تو روزہ ادا نہیں ہوا۔ صبح سحری میں نیت کے بعد بھی کھانے پینے کی اجازت ہے ۔سحری کا وقت ختم ہونے کے بعد ہرگز کچھ کھانا پینا درست نہیں ۔ اگر ختم سحری کو ایک دومنٹ ہوچکے ہوں تو کوئی ایک لقمہ یا قطرہ پانی ہی پی لے تو روزہ ادا نہ ہوگا ۔
سحر کھانا روز ے کے لئے لازم نہیں ۔ اگر کسی نے جان بوجھ کر یا وقت نہ ہونے کی وجہ سے سحری نہ کھائی تو بھی روزہ کی نیت کرے ،اس کا روزہ درست ہوگا ۔ سحری کھانے کی احادیث میں بڑی فضیلت ہے ،اس لئے بلا عذر کے سحری کو ترک کرنے سے پرہیز کرے۔ چاہے سحری کی نیت سے تھوڑا سا پانی ، دودھ ، چائے ، کھجور ، کوئی پھل یا چند لقمےہی کھالے تو سحری کی فضیلت حاصل ہو جائے گی ۔
کوئی ایسی حالت میں صبح اٹھا کہ اس پر غسل لازم تھا تو اب وہ غسل کرے پھر سحری کھائے ۔ تاکہ روزہ بھی ادا ہو اور نماز بھی ۔ اگر وقت کم تھا تو سحری کی نیت سے پانی، دودھ پی لے اور غسل کرے تاکہ نماز وروزہ دونوں ادا ہوسکیں ۔ اگر سحری کھا کر غسل کرنا مشکل ہومثلاً بیمار ہونے کاخدشہ ہو تو پھر پہلے غسل کرے ۔ اگر یہ نہ ہو سکے تو کم سے کم کوئی چیز کھالے یا پی لے اور پھر غسل کرے ۔ اگر پیٹ بھر سحری کھالی اور اب غسل نہ کیا، تو کم از کم طلوع آفتاب سے پہلے پہلے غسل کرکے نمازِ فجر اداکرے ۔ ورنہ اب اس کے بعد غسل کرے گا تو فجر کی نماز سے محروم ہو جائے گا ۔ غسل میں اگر گرم پانی استعمال کیا تو اُمید ہے کہ کوئی خرابی نہ ہوگی ۔ جوشخص یہ کہے کہ ایسی حالت میں سحری کھاکر تیمم کرکے نماز پڑھے ،وہ غلط ہے ۔دن میں روزہ کی حالت میں کھانا پینا ، بیوی سے جماع کرنا روزے کو ختم کردے گا ۔جس شخص نے ایسا کیا اس کو روزے کی قضاء بھی لازم ہے اور دو مہینے کے مسلسل روزے بطور کفارہ کے لازم ہیں ۔یہ حدیث میںصراحتاً موجود ہے ۔
ہاں !اگر کسی نے بھول کر کچھ کھایا پا پیا یعنی اپنے روزے دار ہونے کاخیال نہ رہا تو اس کو نہ روزہ ٹوٹا ، نہ قضا لازم ہوگی نہ کفارہ لازم ہوگا ۔ روزہ کی حالت میں مسواک کرنا ، انجکشن لگوانا ، دانت نکلوانا ، خون نکلوانا درست ہے ۔ اس سے روزے پر کوئی اثر نہیں پڑتا ۔ روزے کی حالت میں احتلام ہو جائے ، خود بخود قے ہوجائے ،کان میں پانی چلا جائے ، منہ میں بلا اختیار دھواں یا کچھ اور چلا جائے تو روزہ پر کوئی اثر نہیں پڑے گا ۔ اسی طرح بُرے شہوانی جذبات سے مذی نکل جائے ، اس طرح منہ میں لعاب جمع ہوکر معدہ میں چلا جائے تو بھی روزہ درست ہے ۔یا ناک کو سٹرک لیا(ناک کا بلغم اوپر کو کھینچ لیا)اور وہ معدہ میں چلی جائے تو روزہ پر کوئی اثر نہ پڑے گا ۔ روزہ میں تیل ، سرمہ ،عطر ،پائوڈر استعمال کرنا درست ہے ۔رزوہ کی حالت میں ٹوتھ پیسٹ کرنے سے روزہ مکروہ ہو جاتاہے ۔ بیوی سے اس طرح بوس وکنا رکرناکہ شہوانیت سے مغلوب ہو نے کا خدشہ ہو ،یہ مکروہ ہے ۔ اگر انزال ہوگیا تو پھر قضا(صرف ایک دن)لازم ہوگی ، کفارہ نہیں۔ اگر بوس وکنار میں جماع کرلیا تو پھر قضا ایک دن اور کفارہ ساٹھ دن بلاناغہ تسلسل کے ساتھ لازم ہوگا ۔ ایسی صورتحال میں بہتر ہے کہ دن میں زوجہ سے دور رہیں ۔ خصوصاًسحری کے بعد یا دوپہر کو ایک بستر پر ہرگز نہ لیٹیں۔
روزہ کی حالت میں نامحرم کو دیکھنا ،ننگے فوٹو دیکھنا ، گانے سننا ، ٹی وی دیکھنا ، گانے گانا ، گالی گلوچ کرنا ،غیبت کرنا ، نماز نہ پڑھنا ، رشوت لینا ، آوارہ پھرنا ، نامحرم کو بلا ضرورت فون کرنا ،فحش باتیں کرنا ،فاحشانہ لباس پہننا ،جس سے دیکھنے والوں میں فحش جذبات اُبھر جائیں ۔ خواتین کا بے پردہ ہوکر باہر پھرنا ، یہ تمام کام حرام ہیں ۔ ساتھ ہی روزے کے اثرات فوائد اور مقصد کو ختم کردیتے ہیں ۔اسی طرح حرام کمائی سے سحری یا افطار کرنا حرام تو ہے ہی مگر ساتھ ہی روزہ کی روح اور اس کی افادیت کو ختم کرنے والی چیز ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔
سوال:-سحری و افطار کے لئے جو وقت متعین ہے کیا ایک دو منٹ کم زیادہ ہونے سے روزے میں کوئی فرق پڑ سکتا ہے؟ کچھ لوگ کہتے ہیں ایک دو منٹ آگے پیچھے ہونے سے کوئی فرق نہیں پڑتا،اس سلسلہ میں رہنمائی فرمائیں۔
عبد العزیز۔۔۔۔۔ ایک سائیل
اوقاتِ سحری و افطار میں تقدیم و تاخیر
جواب:- سحری کھانے کا آخری وقت صبح صادق کا طلوع ہے اور یہ طلوع فجر کہلاتا ہے۔ اس وقت کے ہو جانے پر کھانا پینا بند کرنا لازمی ہے۔صبح صادق کا یہ وقت اختتام سحر، اختتام تہجد، آغاز روزہ اور آغازِ نماز فجر کا وقت ہے۔ اس سلسلے میں یہ امر ملحوظ رہے کہ سحری کے لئے اصل وقت کون سا ہے۔ اس کے لئے محققین، جن میں خاص طور پر علامہ تقی الدین ابن دقیق العید ہیں، نے یہ لکھا ہے کہ پوری رات کے غروب آفتاب سے طلوع صبح صادق تک کے پورے وقفہ شب کے چھ برابر حصے کئے جائیں۔ ان میں اٰخری چھٹا حصہ، جو تقریباً دو گھنٹے ہوں گے یہی دوگھنٹے تہجد کا وقت ہے اور یہی سحری کا بھی وقت ہے۔ اب اس پورے وقت میں کبھی بھی سحری کھاسکتے ہیں۔ اس وقت کا اختتام جس منٹ پر ہوگا یعنی جس منٹ پر صبح صادق کا طلوع ہوگا۔ اُس منٹ سے پہلے ہی سحری سے فارغ ہونا ضروری ہے۔ اگر اس اختتامی لمحہ سے آگے سلسلۂ اکل و شرب باقی رکھاگیا تو وہ روزہ درست نہیں ہوگا۔ اس سلسلے میں حدیث ہے کہ حضرت نبی کریم صلی اللہ علیہ وسلم نے ارشاد فرمایا، تم کو بلال کی اذان سحری کھانے سے نہیں روکنی چاہئے، اس لئے کہ وہ رات میں ہی اذان دیتے ہیں یعنی حضرت بلال کی اذان اس غرض سے ہوتی تھی تاکہ سوئے ہوئے افراد بیدار ہو جائیں اور جو تہجد میں مشغول ہوں وہ سحری کھانے کے لئے نماز کا اختتام کریں۔بہرحال اذانِ بلال اختتام سحری کے لئے ہوتی ہی نہیں تھی۔ اسی لئے اسی حدیث میں آگے حضرت نبی کریم صلی اللہ علیہ وسلم کا ارشاد ہے کہ عبد اللہ ابن ام مکتوم کی اذان پر سحری ختم کرو۔ اس لئے بہرحال ختم سحری کا جو وقت درج ہے اُس سے ایک منٹ بھی آگے کھانے پینے کا سلسلہ جاری رکھنا درست نہیں ہے۔ وہ تو پورے وقفۂ سحری کا اختتامیہ ہے۔اس میں مزید توسع کیسے ہوسکتا ہے۔ اس لئے جو لوگ یہ کہتے ہیں کہ چند منٹ آگے پیچھے ہونے سے کچھ نہیں ہوتا وہ غلط کہتے ہیں، اسی طرح جو لوگ یہ کہتے ہیں کہ اذان صبح کے بعد بھی کھا سکتے ہیں وہ غلط کہتے ہیں۔اس سے یقینا روزہ خراب ہوگا۔چنانچہ تمام فقہاء نے روزے کے مسائل میں لکھا ہے کہ اگر صبح صادق کے بعد یا غروب آفتاب سے پہلے کسی نے کچھ کھالیا تو اُس کا روزہ درست نہ ہوگا۔
دیکھئے نور الایضاع، عالمگیری، درمختار، الجرالرائق، مجمع الاہز،ملتقی الابحر،فتاویٰ تاتا رخانیہ، فتاویٰ قاضی خان، خلاصتہ الفتاوی اور یہی بات تمام شارحین حدیث نے لکھی۔ ملاحظہ ہو فتح الباری شرح بخاری، عمدۃ القاری شرح بخاری،فتح اللہم شرح مسلم ،بذل المجہودشرح ابودائود۔ مرقات شرح مشکوٰۃ وغیرہ۔
۔۔۔۔۔۔۔۔۔۔۔۔۔۔۔۔۔۔۔۔۔۔
سوال:۱-کئی دوکانوں پر مال واسباب کی تزئین وآرائش اور گراہکوں کوراغب کرنے کے لئے انسانی مجسّموں کا سہار الیا جاتاہے ۔ کیا یہ شرعاً جائز ہے ؟
سوال:۲-کئی جگہوں پر جب دُلہن سسرال پہنچتی ہے تو اس کے قدموں میں بھیڑ ذبح کی جاتی ہے ۔ اس کا کھانا اور ایسا عمل کرنا کیسا ہے ؟
سوال:۳-نقلی دانت لگوانے ،دانتوں میں فیلنگ کرنا،اس طرح کے دوسرے طبی ضابطوں کا شریعت کی رو سے کیا حکم ہے ؟
سوال:۴-بالوں اور داڑھی میں کون سا خضاب استعمال کرسکتے ہیں ۔ ہربل ، کالی مہندی ،حنا ہیر کلر وغیرہ استعمال کرسکتے ہیں کیا ؟
حبیب اللہ ،بانڈی پورہ ،کشمیر
مجسّموں سے دوکانوں آرائش حرام
جواب:۱-فیشنوں کی ترغیب دینے والے اور بے حیائی کی کھلی دعوت دینے والے یہ مجسّمے متعدد اعتبار سے حرام ہیں ۔اولاً مجسمہ بنانا ،اپنی دوکانوں کے آگے لگانا ہی حدیث کی رو سے حرام ہے ۔ چنانچہ حدیث میں ہے جو شخص مجسمہ بنائے اُس کو قیامت میں کہاجائے گا کہ اس میں روح بھی ڈالو ۔ جب وہ روح ڈال نہ سکے گا تو اس پر اُس کو عذاب ہوگا ۔ ایک حدیث میں ہے کہ سب سے سخت عذاب مجسمہ بنانے والوں کو ہوگا ۔(بخاری مسلم)
اب اگر کوئی بنے بنائے مجسمہ کو اپنے کپڑوں کی دُکان پرکھڑا کرے تو یہ بھی حرام ہے ۔ اس میں فیشن کی دعوت بھی ہے اور ننگے پن کی ترغیب بھی ۔ یہ دراصل اسلامی تہذیب کو مٹانے کی خاموش تلقین بھی ہے اور یہ غیر اسلامی لباس پہننے کی ذہنیت پیدا کرنے کا عمل بھی ہے اور غیر شرعی طریقہ اپنا کر اپنا بزنس چلانے کا فعل بھی ہے ۔یہ تمام وجوہات اس کے عدم جواز کے اسباب ہیں ۔
دلہن کے سامنے بھیڑ بکری ذبح کرنا حرام
جواب:۲-دُلہن کے سامنے بھیڑ بکری ذبح کرنا سخت حرام ہے اور جو جانور ذبح کیا گیا وہ مُردار ہوگیا اُس کا کھانا کسی کے لئے بھی جائز نہیں ہے ۔ یہ سراسر غیر شرعی عمل ہے ۔ اس کو سختی سے روکنا لازم ہے اور جو اس سے پرہیز نہ کرے اُن کی شادی میں شریک ہونا بھی دُرست نہیں ہے ۔
مسنوعی دانت لگانا درست
جواب:۳- دانتوں میں ہرقسم کی فیلنگ کرنا دُرست ہے ۔مصنوعی دانت لگانابھی درست ہے ۔ ایک صحابی نے پہلے چاندی کی ناک پھر حضرت رسول اکرم صلی اللہ علیہ وسلم کی اجازت سے سونے کی ناک لگوائی تھی ۔اس کا واقعہ ترمذی میں موجودہے اُس صحابی کا نام حضرت عُرفطہ تھا ۔
داڑھی اوربالوں میں مہندی لگانا درست
جواب:۴- داڑھی او ربالوں میں مہندی یا زعفران کاخطاب درست ہے ۔کالی مہندی لگانا جائز نہیں ہے ۔اس سے عمر چھپانے کا کام کیا جاتاہے اس لئے حدیث میں اس کی ممانعت ہے ۔
