سوالـ:۔ مختلف علاقوں میں مسجد کمیٹیاں اخراجات کے لئے محلہ والوں سے ماہانہ رقم مقرر کرتے ہیںجو کہ محلہ والوں کی طرف سے واجب الادا ہوئی۔ تاہم اس میں کچھ محلہ والوں کی رضامندی شامل نہیں ہوتی، کیا بغیر اجازت کسی فرد پرمسجد کےلئے کوئی رقم مقرر کی جاسکتی ہے؟
سوال:۔ دن بدن مسجدوں میں کرسیوں پر نمازپڑھنے کا رجحان بڑھنے لگا ہے۔ پہلے کرسی پر نماز پڑھنے والے صف کی آخر میں بیٹھتے تھے مگرا ب بیچ صف میں بھی کرسیاں لگائی جاتی ہیں، جس سے صف کے اندر کوئی ہمواری نہیں رہتی۔ کیا اس طرح بیچ بیچ میں کرسی لگا کر نماز پڑھنا جائز ہے؟
سوال:۔ میں اپنی والدہ کے ساتھ حج کرنے کےلئے جانا چاہتا ہوں مگر میرے پاس اتنی رقم موجود نہیں ہے جس سے میں حج کرسکوں۔ البتہ میرےاستعمال میں رہائشی مکان میری ضرورت سے زیادہ ہے ،اگر میں اس کو بیچتا ہوں تو مجھے کہیں دور جاکر مکان خریدناپڑھے گا کیوںکہ آج کل اچھی کالونیوں میں مکان کم ہی ملتے ہیں اور اس سے میری فیملی کو بھی تکلیف اُٹھانی پڑے گی۔ دوسری طرف مجھے کوئی اتنی بڑی رقم قرض حسنہ میں بھی نہیں دے سکتا۔ چونکہ میں ماہانہ تنخواہ پر کام کرتا ہوں اس لئے میرے لئے ایک ہی صورت بچتی ہے کہ میں بینک سے قرضہ حاصل کر وں۔ تو کیا اس قرضے کی رقم سے میں اور میر ی ماں حج کرسکتے ہیں؟
سوال:۔ ایک داماد کے لئے سسرال والوں کے کیا فرائض و آداب ہیں اور اسی طرح ایک داماد کے اپنے سسرال والوں کےلئے کیا آداب و لوازمات ہیں؟
سوال:۔ ایک فرما نبردار بیوی کی کیا ذمہ داریاں ہیں؟ صالح خاوند کیسا ہونا چاہئے؟
سوال:۔ آئے دن مسجد وں میں تبلیغی جماعتیں آتی ہیں اور لوگوں کودین کی اور راغب کرنے کی کوشش میں لگتی ہیں۔ ہم نے کئی مرتبہ ان سے سنا ہے کہ جماعت کے ساتھ نکلنے کے بغیر کسی مسلمان کےلئےچارہ نہیں ہے۔ اسکی کیا حقیقت ہے۔ کیا انسان دن بھر کی زندگی میں اپنے ملنے والوں کے ساتھ دین کی بات نہیں کرسکتا ہےیا جماعت کے ساتھ دین کی بات پہنچانے کا اور کوئی متبادل نہیں؟
برائے مہربانی ان سوالا ت کا شرعی احکامات کے مطابق جوابات تحریر فرما کر رہنمائی فرمائیں؟
ابو احمد عبداللہ
حمزہ کالونی الٰہی باغ سرینگر
تمام سوالات کے جوابات حسب ترتیب درج ذیل ہیں۔
مسجد کےلئے مقررہ چندہ
جواب:۔ مسجد کی ضروریات کے لئے تعاون اور چندہ لینا درست ہے مگر اس کے لئے صحیح طریقہ کار یہ ہے کہ ہر شخص سے اس کی آمدنی اورجذبہ کے مطابق چندہ لیا جائے۔ اگر مسجد کی انتظامیہ ازخود کوئی مقدار طے کر ے تو محلے کے لوگ اپنی رضامندی سے وہ تسلیم کریں۔ اگر کوئی شخص مقدارکو قبول نہ کرے تو اس پر جبر کرنا درست نہیں۔
کرسی پر بیٹھ کر نما زپڑھنے کا مسئلہ
جواب:۔ جو لوگ کھڑے ہوکر نماز نہ پڑھ سکیں اور زمین پر بیٹھ کر بھی نماز نہ پڑھ سکیں اوراُن کو کرسی پر نما زپڑھے بغیر جب کوئی چارہ نہ ہو تو تو اُن کےلئے جائز ہے کہ وہ کرسی پر نماز پڑھیں۔ مگر ان کےلئے بہتر ہے کہ صفوں کے کنارے پر اپنی کرسی رکھیں۔ تاکہ صفوں کے درمیان کا تسلسل برقرار رہے ورنہ صفوں کےدرمیان جو خلل پیدا ہوتا ہے وہ طبع سلیم کےلئے یقیناً باعث انقباض ہوتاہے۔
بنک سے سود لے کر حج کرنا درست نہیں
جواب:۔ بینک سے قرض لے کر حج نہ کیا جائے۔ اس لئے کہ یہ سودی قرض لینا ہے اور سودلینا جیسے حرام ہے ویسے ہی دینا بھی حرام ہے۔ اگر مکان فروخت کرکے پھر کسی ایسے محلے یا علاقہ میں رہائش اختیار کی جائے جہاں نسبتہً کم قیمت کا مکان مہیا ہوپائے اور اہل خانہ کو کوئی واقعی حرج نہ ہو تو پھر بقیہ رقم حج کے استعمال کےلئے درست ہے۔ اس طرح حج بھی ادا ہوگا اور کوئی گناہ مثلاً بنک کا سود دینا بھی نہ کرنا پڑےگا۔
سسرال والوں کے تئیں داماد کے فرائض
جواب:۔ سسرال والوں کے ساتھ حسن سلوک کرنا ،محبت، صلہ رحمی، خوشی و غمی میں ان کی معاونت کرنا ،موقع بموقع ملاقات کرنا۔ ان کو اپنا محسن مان کر ان کے ساتھ حسن اخلاق کا رویہ رکھنا داماد کااخلاقی فریضہ ہے ۔ اسی طرح سسرال والوں کو بھی شفقت، محبت اور اولاد جیسی نظر کرنا ضروری ہے دو طرفہ اخلاقی برتائو دونوں کےلئے رحمت ہے ۔
ازدواجی زندگی کے حقوق و فرائض
جواب:۔ بیوی کےلئے شوہر کے حقوق اور شوہر کےلئے بیوی کے حقوق کیا کیا ہیں اس کے لئے یہ کتابیں پڑھی جائیں تحفۂ دولہا، تحفہ ٔدلہن، ازدواجی زندگی کے رہنما اصول۔ مثالی خاوند اور مثالی بیوی۔
دعوت کی محنت کا صلہ
جواب:۔ دعوت تبلیغ کی محنت صرف اسلئے ہے کہ اس کےلئے ذریعہ ایمان میں پختگی،اعمال کا شوق، سنتوں کی رغبت، گناہوں سے بچنے کا مزاج پید اہوتا ہےنیز یہ دوسرے مسلمانوں کےدین دار بننے کی محنت اور کوشش ہے ۔چنانچہ لاکھوں انسا ن دعوت تبلیغ کی محنت سے دین پر چلنے والے اور احکام دین پر عمل کرنے والے بن گئے۔یہ ایک بدیہی مشاہدہ ہے کہ دعوت کی اس محنت سے دینداری پیدا ہوگی۔
………………………………………….
سوال:۔ ہماری عدالتوں میں عرائض نویس حضرات اور وکلاء حضرات طلاق نامہ لکھتے ہیں تو عام طو ر پر سہ طلاق یا انگریزی میں(Tripal Talaq) لکھتے ہیں۔بعد میںبعض اوقات طلاق دینے والے مرد اور اُس کی مطلوقہ عورت دوبارہ رشتہ جوڑنا چاہتے ہیں مگر تین طلاق تحریری کی وجہ مشکل ہوجاتا ہے۔ایسی حالات میں کیاہدایت ہے طلاق نامہ لکھنے کےلئے تفصیل سے جواب مطلوب ہے؟
اویس احمد خان
کپوارہ
بہ یک وقت سہ طلاق دینا شرعاً منع
جواب:۔ طلاق کی اجازت شریعت اسلامیہ میں صرف اُس صورت میں ہے جب صلح اور آپسی مفاہمت کی تمام صورتیں ناکام ہو جائیں اور رشتہ کو باقی رکھنا دونوں کےلئے رحمت کے بجائے زحمت اور راحت کے بجائے اذیت اور کلفت بن جائے۔ پھر طلاق میں بیک وقت تینوں طلاق دینا شرعاً سخت منع ہے۔ حدیث میں ہے کہ حضرت رسول اکرم ﷺ کی خدمت میںکسی صحابی کی یہ صورت حال عرض گئی کہ اس نے اپنی زوجہ کو بیک وقت تین طلاق دیں۔ یہ سن کر رسول اکرم ﷺ سخت غضبناک ہوگئے اور ناراضگی میں کھڑے ہو کر فرمایا کہ کیا اللہ تعالیٰ کی کتاب کے ساتھ کھلواڑ ہونے لگا جب کہ میں ابھی تمہارے درمیان موجود ہوں ۔ یہ حدیث نسائی میں ہے۔
دیکھئے طلاق دینے کی اجازت کے باوجود حضرت نبی کریم ﷺ سخت غضب ناک ہوگئے ۔کیوں؟ اس لئے کہ بیک وقت تین طلاق دی اس لئے بیک وقت طلاق دینا شریعت کے مقرر کردہ ضابطہ طلاق کے بالکل خلاف ہے۔لہٰذا زبانی طلاق دینی ہو یا تحریری ،پھر تحریر خود لکھنی ہو یا کسی وکیل یا عرائض نویس سے لکھوائی جائے۔ اس بات کا پورا اہتمام کیا جائے کہ تین طلاق یا سہ طلاق Tripal Divorce،ہر گز نہ بولا جائے نہ لکھاجائےاورنہ لکھوایاجائے۔اس سلسلے میں وکلاء حضرات اور عرائض نویسی کا کام کرنے والے حضرات ہرگز تین طلاق نہ لکھیں اور اگر طلاق دینے والا مرد یا طلاق لینے والی عورت اصرار کرے کہ سہ طلاق یا تین طلاق ہی لکھی جائے تو اُ سےسمجھا یا جائے کہ ایک طلاق بائن سے بھی مقصد پورا ہوسکتا ہے اور وہ ہے رشتہ پوری طرح ختم کرنا ۔ لہٰذا ایک طلاق بائن ہی لکھانا شریعت کی منشاء ہے اور تین طلاق لکھنا لکھوانا دونوں گناہ ہیں۔
بیک وقت تین طلاق دینے کے غیر شرعی اقدام کا نتیجہ یہ ہے کہ اسلام کے خلاف طرح طرح کے غیر مناسب الزامات لگانے کا موقعہ فراہم کیا جاتا ہےاور آج کل چاروں طرف یہی صورتحال ہے کہقصور اور غلطی مسلمان کرتا ہے اور طعن و تشنیع یا تحریف و تغیر کا نشانہ اسلام کو بنایا جاتاہے۔ فیا اسفاہ!
سوال:۲-کچھ مسجدوں میں متولی مسجد بغیر ٹوپی نماز پڑھنے نہیں دیتے خاص کر نوجوانوں اور بچوں کو ۔اگرچہ خود داڑھی نہیں رکھتے ، راہنمائی کریں ۔
سوال:۱-سردیوں میں کچھ لوگ عموماً تنگ دراز ٹانگوں میں پہن کرنماز ادا کرتے ہیں ۔ کچھ لوگ اعتراض کرتے ہیں ۔ کچھ جواز نکالتے ہیں ؟ ابوالمبشر علی
ننگے سر نماز پڑھناخلاف سنت
جواب:۲-ننگے سر نماز پڑھنا سراسربدعت اور سنت کے خلاف ہے ۔ حضرت نبی کریم علیہ السلام نے پوری زندگی میں کبھی کوئی نماز ننگے سر نہیں پڑھائی ہے ۔ نہ حضرات صحابہ کرامؓ سے کبھی اس کا کوئی ثبوت ملتاہے کہ انہوں نے کوئی فرض نماز یا سنت ننگے سر ادا کی ہو۔ اس لئے قرآن کریم کے حکم کے مطابق نماز کی ادائیگی کے لئے زینت اختیار کیاجائے ۔سورہ اعراف آیت 31میں اس کا حکم دیا گیا ہے ۔ اور زینت میں جب مسنون لباس کے مطابق ہی عمل کرنا ہوگا تو حکم قرآن پورا ہوگا۔
نماز اور تنگ لباس
جواب:۱-وہ تنگ اورچست لباس جس سے جم کے اعضاء ،خصوصاً ران اور سُرین کا حجم ،نمایاں طور پر محسوس ہو۔ اس لباس کو پہن کر نماز پڑھنامکروہ ہے ۔لہٰذا صرف دراز پہن کر یا ستھنا پہن کر جونماز پڑھی جائے وہ مکروہ ہے ۔ جس لباس کو پہن کر کسی دفتر یا کسی معزز تقریب میں نہ جاسکیں وہ لباس پہن کر نماز کیسے ادا ہوگی۔
