نئی دہلی// پانچ ریاستوں کے اسمبلی انتخابات میں کانگریس کی شکست کے بعد پارٹی کے ناراض لیڈروں کا ایک گروپ جی 23 گاندھی خاندان کے خلاف آواز اٹھانے لگا ہے اور آج انہوں نے راجیہ سبھا میں اپوزیشن کے سابق لیڈر غلام نبی آزاد کےگھرمیٹنگ کی۔
ذرائع کے مطابق کپل سبل، ہریانہ کے سابق وزیر اعلی بھوپندر سنگھ ہڈا، آنند شرما، منیش تیواری، ششی تھرور، سندیپ دکشٹ، پرنیت کور، منی شنکر ایئر، شنکر سنگھ باگھیلا، کلدیپ شرما سمیت کئی لیڈروں نے میٹنگ میں شرکت کی۔
ناراض دھڑے کے ان لیڈروں نے اتوار کو یہاں پارٹی ہیڈکوارٹر میں منعقدہ کانگریس کی اعلیٰ ترین پالیسی ساز تنظیم کانگریس ورکنگ کمیٹی کی میٹنگ میں بھی یہ مسئلہ اٹھایا، لیکن پارٹی صدر سونیا گاندھی کے حامیوں نے متفقہ طور پر محترمہ گاندھی کو صدر رہنے کی حمایت کی۔
گروپ 23 کے ان لیڈروں نے میٹنگ سے پہلے پارٹی جنرل سکریٹری مکل واسنک کو صدر بنانے کی تجویز بھی کانگریس ہائی کمان کو بھیجی تھی جسے پارٹی نے ٹھکرا دیا تھا۔ اس کے ایک دن بعد ناراض گروپ کے سرکردہ لیڈر کپل سبل نے ایک انگریزی اخبار کو انٹرویو دیتے ہوئے کہا کہ کانگریس صدر کا عہدہ گاندھی خاندان کو اب چھوڑدیناچاہیے اوراس عہدے ہر کسی اور کو بٹھایاجانا چاہیے۔
