عظمیٰ نیوز سروس
جموں//لوک سبھا میں قائد حزب اختلاف راہل گاندھی آج یعنی بدھ کے روز رام بن اور اننت ناگ اضلاع میں دو عوامی ریلیوں سے خطاب کریں گے، جو 10 سال کے وقفے کے بعد منعقد ہونے والے جموں و کشمیر اسمبلی انتخابات کے لیے کانگریس کی مہم کا آغاز کریں گے۔یہ ریلیاں 18 ستمبر کو ہونے والے انتخابات کے پہلے مرحلے میں لڑنے والے پارٹی کے امیدواروں کی مہم کا حصہ ہیں۔راہل گاندھی کے علاوہ، کانگریس کے سربراہ ملکارجن کھرگے، سونیا گاندھی اور پرینکا گاندھی آنے والے تین مرحلوں کے اسمبلی انتخابات میں پارٹی کے 40 اسٹار پرچارکوں میں شامل ہیں۔جموں و کشمیر اسمبلی کے 90 ارکان کے انتخاب کے لیے پولنگ 18، 25 ستمبر اور یکم اکتوبر کو ہوگی۔ پردیش کانگریس کمیٹی سربراہ طارق حمید قرہنے بتایاکہ راہل گاندھی بدھ سے پارٹی کی مہم کا آغاز کریں گے۔ وہ بدھ کو کانگریس امیدواروں کی حمایت میں رام بن اور اننت ناگ اضلاع میں دو عوامی جلسوں سے خطاب کریں گے۔قرہ نے کہا کہ راہل گاندھی بدھ کو دہلی سے جموں پہنچیں گے اور پھر دوپہر میں ایک ریلی سے خطاب کرنے کے لیے رام بن ضلع کے گول علاقے میں پرواز کریں گے۔وہ پارٹی کے جموں و کشمیر یونٹ کے سابق سربراہ وقار رسول وانی کے لیے مہم چلائیں گے، جو بانہال اسمبلی حلقہ سے انتخاب لڑ رہے ہیں۔ اس سیٹ کے لیے پہلے مرحلے میں 18 ستمبر کو پولنگ ہوگی۔گاندھی اس کے بعد اننت ناگ ضلع کے ڈورو علاقہ جائیں گے، جہاں وہ کانگریس جنرل سکریٹری اور سابق وزیر غلام احمد میر کی حمایت میں ایک اور ریلی سے خطاب کریں گے، جو ڈورو اسمبلی حلقہ سے لڑ رہے ہیں۔انہوں نے کہا کہ لوک سبھا میں اپوزیشن لیڈر شام کو سرینگر سے دہلی واپس آئیں گے۔
