عظمیٰ نیوز سروس
جموں//چیئرمین ڈی پی اے پی غلام نبی آزاد نے وادی چناب میں سیکولر ووٹ کو تقسیم کرنے میں این سی اور کانگریس کے کردار پر سخت تنقید کی۔ کشتواڑ میں ایک جلسہ عام سے خطاب کرتے ہوئے آزاد نے کہا کہ ڈی پی اے پی نے سب سے پہلے بی جے پی کے بعد اپنے امیدوار کا اعلان کیا، پھر کانگریس نے ایسے امیدوار کا اعلان کیا جس کا ٹریک ریکارڈ فرقہ وارانہ تھا، پھر بھی این سی لیڈران اب ان کیلئے مہم چلا رہے ہیں۔انہوں نے وادی چناب میں پچھلی دہائی کے دوران ان کی عدم موجودگی اور شراکت کی کمی پر سوال اٹھایا اور پوچھا کہ انہوں نے خطے کے باشندوں کے لئے کیا ٹھوس کوششیں کی ہیں۔ انہوں نے کہاکہ’’ یہ لیڈر وادی چناب میں سیاحوں کے طور پر آتے ہیں، بی جے پی کی مدد کرتے ہیں اور ہمارے ووٹوں کو توڑتے ہیں‘‘۔موصوف نے نیشنل کانفرنس کو تنقید کا نشانہ بناتے ہوئے کہاکہ پارٹی نے کتنے اسکول، سڑکیں، یا کالج تعمیر کیے؟ انہوں نے محض استحصال کیا اور ہماری عوام کو دھوکہ دیا میں اسے دوبارہ نہیں ہونے دوں گا‘‘۔ انہوں نے عوام پر زور دیا کہ وہ سیاسی فائدے کے لئے ان کا استحصال کرنے والی جماعتوں کے خلاف ہوشیار رہیں۔ انہوں نے کانگریس قیادت کی کوتاہیوں کی نشاندہی کرتے ہوئے بی جے پی کی انتخابی کامیابیوں کو ان ناکامیوں کا ذمہ دار ٹھہراتے ہوئے کہا کہ عوام کی پریشانیوں کو دور کرنے کے بجائے ایسی پارٹیوں کے قائدین مکروہ سیاست میں مصروف ہیں۔ انہوں نے کہا،کہ’’اگر آج کانگریس ہار رہی ہے تو اس کی وجہ ان کی ناکام قیادت ہے۔ وہ صرف مخالفین کو گالی دیتے ہیں، یہاں تک کہ ان لوگوں کو بھی جو قیادت کی تبدیلی کا مطالبہ کرتے ہیں۔ کانگریس میں اب جمہوریت نہیں ہے‘‘۔ انہوں نے خود حکمرانی اور خود مختاری کے ایجنڈوں کو ترک کرنے کے لئے این سی قیادت اور دیگر علاقائی جماعتوں پر تنقید کی۔ انہوں نے ان کے پچھلے نعروں کے پیچھے اخلاص پر سوال اٹھاتے ہوئے ان پر برسوں سے لوگوں کے جذبات کا استحصال کرنے کا الزام لگایا۔آزاد نے ترقی اور امن پر اپنی پارٹی کی غیر متزلزل توجہ کا اعادہ کیا۔ انہوں نے اس کام کو جاری رکھنے کی اہمیت کو اجاگر کرتے ہوئے اسکولوں، کالجوں اور سڑکوں کی تعمیر کے اپنے عزم پر زور دیا۔ لوگوں کے استحصال کو مسترد کرتے ہوئے، آزاد نے تصدیق کی کہ ان کا مشن اور ایجنڈا کمیونٹی کی خدمت اور ترقی کو فروغ دینے پر مرکوز ہے۔
