عظمیٰ نیوزڈیسک
نئی دہلی//یومِ آزادی کے موقع پر کانگریس کے دہلی میں واقع مرکزی دفتر میں پرچم کشائی کا خصوصی پروگرام منعقد کیا گیا۔ اس موقع پر کانگریس کے صدر ملکارجن کھڑگے نے پرچم بلند کر کے تقریب کا آغاز کیا، جبکہ اس موقع پر لوک سبھا میں قائد حزب اختلاف راہل گاندھی بھی موجود تھے۔قابل ذکر بات یہ رہی کہ کانگریس دفتر میں پرچم اتنی بلندی پر لگایا گیا تھا کہ اسے ریموٹ کنٹرول کے ذریعے لہرانا پڑا۔ تقریب کے دوران اچانک بارش شروع ہو گئی، مگر اس کے باوجود راہل گاندھی بارش میں کھڑے رہ کر قومی ترانہ گاتے نظر آئے۔ اس لمحے کی ویڈیو سوشل میڈیا پر وائرل ہو گئی اور صارفین نے ان کے جذبے اور حوصلے کی تعریف کی۔قبل ازیں، راہل گاندھی نے سوشل میڈیا پلیٹ فارم ’ایکس‘ پر بھی ملک کے باشندگان کو یومِ آزادی کی مبارکباد دی۔ انہوں نے لکھا، ’’ملک کے تمام باشندگان کو یومِ آزادی کی دلی مبارکباد۔ عظیم آزادی پسند رہنماؤں کے قربانیوں سے حاصل یہ آزادی ایک ایسے ہندوستان کی تعمیر کا عزم ہے جہاں انصاف کی بنیاد سچائی اور مساوات پر ہو، اور ہر دل میں عزت اور بھائی چارہ قائم ہو۔ اس انمول ورثے کے وقار اور احترام کی حفاظت ہم سب کا فرض ہے۔‘‘تقریب میں کانگریس کے سینئر رہنما، کارکن اور بڑی تعداد میں حامی شریک ہوئے۔ بارش کے باوجود شرکاء کے جوش و جذبے میں کمی نہیں آئی اور کانگریس دفتر قوم پرستی کے نعرے اور ترانوں سے گونج اٹھا۔
