کانوں اور معدنیات سے منسلک زمینیں

 عظمیٰ نیوز سروس

نئی دہلی//مرکز کو ایک جھٹکا دیتے ہوئے سپریم کورٹ نے جمعرات کو کہا کہ ریاستوں کو آئین کے تحت کان کنی اور معدنیات سے متعلق زمینوں پر ٹیکس لگانے کی قانون سازی کا حق حاصل ہے۔ نو ججوں پر مشتمل آئینی بنچ نے کہا کہ معدنیات پر قابل ادائیگی رائلٹی ٹیکس نہیں ہے۔چیف جسٹس ڈی وائی چندرچوڑ، جنہوں نے اپنے اور بنچ کے سات ججوں کے لیے فیصلہ پڑھ کر سنایا، کہا کہ پارلیمنٹ کو آئین کی فہرست II کے اندراج 50 کے تحت معدنی حقوق پر ٹیکس لگانے کا اختیار نہیں ہے۔آئین کی فہرست II کا اندراج 50 معدنی حقوق پر ٹیکسوں سے متعلق ہے جو معدنی ترقی سے متعلق قانون کے ذریعہ پارلیمنٹ کی طرف سے عائد کردہ کسی بھی حدود سے مشروط ہے۔ سی جے آئی نے کہا کہ سپریم کورٹ کے سات ججوں کی آئینی بنچ کا 1989 کا فیصلہ، جس نے کہا تھا کہ رائلٹی ٹیکس ہے، غلط ہے۔شروع میں، سی جے آئی نے کہا کہ بنچ نے دو الگ الگ فیصلے سنائے ہیں اور جسٹس بی وی ناگرتھنا نے اختلافی رائے دی ہے۔اپنا فیصلہ پڑھتے ہوئے جسٹس ناگارتھنا نے کہا کہ ریاستوں کے پاس قانون سازی کی اہلیت نہیں ہے کہ وہ زمینوں پر مشتمل کانوں اور معدنیات پر ٹیکس لگائے۔بنچ نے اس انتہائی متنازعہ مسئلہ کا فیصلہ کیا کہ آیا معدنیات پر قابل ادائیگی رائلٹی مائنز اینڈ منرلز (ڈیولپمنٹ اینڈ ریگولیشن)ایکٹ 1957 کے تحت ٹیکس ہے، اور اگر صرف مرکز کو اس طرح کی وصولی کا اختیار حاصل ہے یا ریاستوں کو بھی اپنے علاقے میں معدنیات سے متعلق زمین پر محصولات عائد کرنے کا اختیارہے۔