لاہور // پاکستانی ٹیم میں سلیکشن سے محروم وکٹ کیپر بلے باز کامران اکمل کی جانب سے شاندار کارکردگی اور ریکارڈز بنانے کا سلسلہ جاری ہے اور اب انہوں نے ایک ایسا ریکارڈ قائم کردیا جو آج تک کوئی ایشین کھلاڑی نہ بنا سکا۔ وکٹ کیپر بلے باز 800 فرسٹ کلاس کیچ لینے والے پاکستان اور ایشیا کے پہلے بلے باز بن گئے ہیں ۔ ماضی میں وکٹ کیپنگ کی ناقص کارکردگی کے سبب عوام میں غیرمقبول 35 سالہ وکٹ کیپر اپنی شاندار کارکردگی عوام کی رائے بدلنے کی کوششوں میں مصروف ہیں۔قائد اعظم ٹرافی کے سپر ایٹ کے میچ میں کامران اکمل نے 800 فرسٹ کلاس کیچوں کا سنگ میل عبور کیا۔ انہوں نے پہلی اننگز میں پانچ اور دوسری اننگز میں دو شکار سمیت مجموعی طور پر میچ میں سات کیچ لیے ۔کامران اکمل یہ اعزاز حاصل کرنے والے نہ صرف پاکستان بلکہ ایشیا کے پہلے وکٹ کیپر ہیں اور ان سے قبل کوئی بھی ایشین کھلاڑی یہ اعزاز حاصل نہ کر سکا۔ 800 فرسٹ کلاس کیچ لینے والوں میں 31 کا تعلق انگلینڈ سے ہے جبکہ اس کے علاوہ روڈنی مارش اور کامران اکمل کو یہ اعزاز حاصل ہے ۔ 1997 میں فرسٹ کلاس کیریئر کا آغاز کرنے والے کامران اکمل اب تک 227 میچوں میں 804 کیچ اور 61 اسٹمپ سمیت مجموعی طور پر 865 کھلاڑیوں کا وکٹوں کے عقب میں شکار کر چکے ہیں۔
کامران اکمل 800 فرسٹ کلاس کیچ لینے والے پاکستان اور ایشیا کے پہلے کھلاڑی
