عظمیٰ نیوز سروس
سرینگر//کارپوریٹ سماجی ذمہ داری (CSR)کے تحت صحت کی دیکھ بھال میں لوگوں کی فلاح و بہبود کیلئے جموںکشمیر بینک نے شیر کشمیر میڈیکل سائنسز انسٹی ٹیوٹ(SKIMS) کو ایک جدید ترین کریٹیکل کیئر ایمبولینس فراہم کی۔مکمل طور پر لیس ایمبولینس جو کہ ایمرجنسی اور جان لیوا حالات میں مریضوں کی دیکھ بھال کے لیے بنائی گئی ہے،کو SKICCمیں منعقدہ ایک سرکاری تقریب کے دوران حوالے کیا گیا۔بینک کی جانب سے چیف جنرل منیجر(آپریشنز)امتیاز احمد بٹ نے وزیر اعلیٰ عمر عبداللہ، بینک کے جنرل منیجر اور ڈویژنل ہیڈ (کشمیر) ارشد قادری، جنرل منیجر محمد مظفر وانی اورہسپتال و انتظامیہ کے دیگر اعلی افسران کی موجودگی میںڈائریکٹر سکمزڈاکٹر محمد اشرف گنائی کو گاڑی کی علامتی چابی پیش کی۔اس موقع پر خطاب کرتے ہوئے CGMامتیاز احمد بٹ نے کہا’’ایک ذمہ دار مالیاتی ادارے کے طور پرجموں کشمیربینک پورے خطے میں صحت عامہ کے بنیادی ڈھانچے کو بہتر بنانے کیلئے بامعنی کردار ادا کرنے کے اپنے عزم میں ثابت قدم ہے۔ یہ اہم نگہداشت والی ایمبولینس اس بات کو یقینی بنانے کیلئے حکومتی کوششوں کی تکمیل کی جانب ایک اور قدم ہے کہ ہمیں زندگی بچانے والی طبی سہولیات فراہم کرنے کی ضرورت ہے۔یہ اقدام اپنے CSR پروگرام کے تحت صحت کی دیکھ بھال، تعلیم اور کمیونٹی کی ترقی جیسی اہم سماجی ضروریات کو پورا کرتے ہوئے بینکنگ سے آگے اپنی مدد کو بڑھانے کے بینک کے وسیع وژن کی نشاندہی کرتا ہے۔
