عظمیٰ نیوز سروس
سرینگر // وزیر اعلیٰ عمر عبداللہ نے کہا ہے کہ کابینہ میں توسیع جموں و کشمیر میں ضمنی انتخابات ہونے کے بعد ہو گی اوربڈگام ضمنی انتخاب کے امیدوار کا اعلان اگلے 48 گھنٹوں کے اندر کر دیا جائے گا۔انہوں نے کہا کہ اب بھی چند اور وزرا کابینہ میں شامل ہونے کا امکان ہے۔انہوں نے کہا “یہ ایک ایسی چیز ہے جس پر میں سرگرمی سے غور کر رہا ہوں، ایک بار ضمنی انتخابات ہوں گے، ہم دیکھیں گے کہ کیا ہوتا ہے،” ۔ ایک سال مکمل ہونے پر سرینگر میں ایک پریس کانفرنس سے خطاب کرتے ہوئے وزیر اعلیٰ نے کہا کہ عوام کے ساتھ کئے گئے تمام وعدے پانچ سالہ دور اقتدار میں پورے کیے جائیں گے۔انہوں نے 2024 کے اسمبلی انتخابات سے پہلے وعدے کے مطابق 12 گیس سلنڈر اور راشن کوٹہ میں اضافے کے سوال کا جواب دیتے ہوئے کہا”ہمارے راستے میں کچھ رکاوٹیں ہیں، لیکن منشور میں عوام سے ہمارے تمام وعدے پانچ سالوں میں پورے ہوں گے،” ۔وزیر اعلیٰ نے سمارٹ میٹروں کی تنصیب کے معاملے پر کہا کہ پارٹی نے اپنے منشور میں کبھی بھی سمارٹ میٹروں کو ختم کرنے کا وعدہ نہیں کیا۔ انہوں نے کہا کہ ہم نے عوام سے 200 مفت یونٹس دینے کا وعدہ کیا تھا جو صرف اس وقت ممکن ہو سکتا ہے جب سمارٹ میٹر لگائے جائیں، اگر سمارٹ میٹر نہیں لگائے گئے تو وعدے پورے نہیں ہو سکتے کیونکہ صارفین کے بوجھ کا اندازہ لگانے کا کوئی عمل نہیں ہو گا۔انہوں نے کہا کہ حکومت اس بات کو یقینی بنانے کی کوشش کر رہی ہے کہ عوام کو بجلی کی بہتر فراہمی اور بلوں میں کمی ہو اور یہ سمارٹ میٹر کی تنصیب کے بعد ہی ممکن ہوا ہے۔ انہوں نے مزید کہا کہ “محکمہ نے سردیوں کے دوران بہتر فراہمی کو یقینی بنانے کی کوشش کی اور حالیہ سیلاب میں بھی بجلی کی سپلائی بحال کی گئی۔ میں اپنے وعدوں کو پورا کرنے کے لیے لوگوں کو بہتر فراہمی، انفراسٹرکچر کو یقینی بنانا چاہتا ہوں۔”سی ایم عمر نے یہ بھی کہا کہ جہاں تک غریب صارفین کا تعلق ہے، لوڈ کا صحیح اندازہ لگانے سے ان کے بجلی کے بلوں میں کمی آئی ہے۔ انہوں نے کہا کہ ہم غریبوں کو مفت یونٹس، بلوں میں کمی اور صارفین کو بہتر فراہمی کو یقینی بنانا چاہتے ہیں۔
