ڈیلی ویجروں کی فہرست پر سوالیہ،حکومت نے اسے فراڈ قرار دیا

 سری نگر//ڈیلی ویجروں کی مستقلی سے متعلق انٹرنیٹ پردستیاب فہرست کوفراڈقراردیتے ہوئے وزیرخزانہ ڈاکٹرحسیب درابونے واضح کیاکہ ابھی مستحق عارضی ملازمین کی فہرستوں کوحتمی شکل دیناباقی ہے ۔انہوں نے انٹرنیٹ پرفرضی لسٹ ڈالنے والے افرادکیخلاف سخت کارروائی کااعلان کرتے ہوئے کہاکہ ملزم یاملزمان کی نشاندہی کاکام شروع کیاگیاہے۔ گزشتہ چوبیس گھنٹوں سے ایک سرکاری محکمہ کی ویب سائٹ پرمختلف محکموں میں تعینات عارضی ملازمین بشمول ڈیلی ویجروں اورکیجول لیبروں وغیرہ کی ایک لمبی لسٹ موجودہے ،جس میں شامل ہزاروں ایسے عارضی ملازمین سے مختلف لوازمات مکمل کرنے کوکہاگیا۔اس فہرست کولیکرریاست بشمول وادی کے اطراف واکناف میں عارضی ملازمین اوراُنکے اہل خانہ میں خوشی کی لہردوڑگئی جبکہ سینکڑوں ایسے عارضی ملازمین نے اس فہرست یالسٹ کی حقانیت کے بارے میں جانکاری طلب کی ۔ جب اس سلسلے میں ریاست کے وزیرخزانہ ڈاکٹرحسیب احمددرابوکیساتھ فون پررابط کیاگیاتوموصوف نے یہ چونکادینے والاانکشاف کیاکہ انٹرنیٹ پرچڑھائی گئی لسٹ فراڈہے ۔انہوں نے کہاکہ ریاستی سرکاریااسکے کسی محکمہ کی جانب سے ایسی کوئی لسٹ ویب سائٹ پرنہیں ڈالی گئی ہے بلکہ کسی شخص یااشخاص نے یہ شیطانی کرکے ہزاروں ڈیلی ویجروں اورکیجول لیبروں کیساتھ بھونڈامذاق کیاہے۔وزیرخزانہ نے کہاکہ ریاستی سرکارنے فراڈاورفرضی لسٹ ایک ویب سائٹ پرچڑھانے والوں کیخلاف کارروائی شروع کردی ہے اوربہت جلدایسے افرادکی نشاندہی کرکے اُنھیں قانون کے دائرے میں لایاجائیگا۔ڈاکٹردرابونے اسکے ساتھ ہی یہ واضح کردیاکہ ابھی مستحق عارضی ملازمین کی فہرستوں کوحتمی شکل دیناباقی ہے۔انہوں نے کہاکہ ابھی یہ عمل جاری ہے ۔