اشتیاق ملک
ڈوڈہ //ڈوڈہ ضلع کے بالائی علاقوں گذشتہ روز ہوئی شدید بارشوں کے باعث جہاں ندی نالوں میں طغیانی آگئی ہے وہیں بیشتر علاقوں میں پگڈنڈی راستے تباہ ہوئے ہیں جبکہ پانی و بجلی کے ترسیلی نظام کو بھی نقصان پہنچا ہے۔اطلاعات کے مطابق جمعہ کی شب ہوئی شدید بارشوں کے باعث ڈوڈہ، بھدرواہ، ٹھاٹھری و گندوہ بھلیسہ کے مضافات میں سیلابی صورتحال پیدا ہوئی اور رابطہ سڑکیں زیر آب آئیں جبکہ ندی نالوں میں بھی پانی کی سطح میں اضافہ ہوا۔اس دوران پکڈنڈی راستے تباہ ہوئے اور متعدد دیہات میں پانی کی سکیموں کو نقصان پہنچا اور بجلی نظام بھی متاثر ہوا تاہم بارشوں کے نتیجے میں گرمی سے لوگوں کو راحت ملی ہے اور زرعی شعبے میں بھی بہتری آئی ہے۔
