اشتیاق ملک
ڈوڈہ //ڈوڈہ ضلع میں اتوار کو زلزلہ کا درمیانہ درجے کا جھٹکا محسوس کیا گیا جس کے نتیجے میں لوگ خوفزدہ ہوئے تاہم اس دوران کوئی جانی نقصان نہیں ہوا ہے البتہ کئی رہائشی و غیر رہائشی مکانات میں بڑے بڑے شگاف پڑ گئے۔اطلاعات کے مطابق اتوار کی صبح 11بجکر 21منٹ پرریکٹر سکیل پر 4.1شدت کازلزلہ ہوا جس کا مرکز ڈوڈہ ضلع کی سب ڈویژن گندوہ سے چار کلومیٹر دور مشرق کی طرف تھا۔اس جھٹکے کے فوراً بعد لوگ اپنے گھروں سے باہر نکل آئے۔ایس ڈی ایم گندوہ ارون کمار بڈیال نے کشمیر عظمیٰ کو بتایا کہ زلزلہ کے جھٹکے سے کسی جانی نقصان نہیں کی اطلاع موصول نہیں ہوئی ہے ۔واضح رہے کہ ڈوڈہ ضلع میں 2013سے زلزلہ کے جھٹکوں کا سلسلہ جاری ہے اور اب تک اس خطہ میں سینکڑوں جھٹکے محسوس کئے گئے ہیں اور کئی رہائشی و غیر رہائشی مکانات کو بھی نقصان پہنچا ہے۔پچھلے ایک ہفتہ میں علاقہ میں 4سے زائد جھٹکے ہوئے ہیں۔
