اشتیاق ملک
ڈوڈہ//ڈوڈہ ضلع میںایک المناک حادثہ کے دوران ٹیمپو ٹرولر لڑھک کر گہری کھائی میں گرا جس کے نتیجے میں کمسن بچی سمیت 7افراد لقمہ اجل جبکہ میاں بیوی سمیت 17افراد زخمی ہوئے۔حادثہ منگل کی صبح 9 بجے کے قریب بھرت سے ڈوڈہ کی طرف آرہے ایک ٹیمپو ٹرولر زیر نمبر JK06-4847 کو اس وقت پیش آیا جب ٹیمپوپونڈہ کے مقام پر ڈرائیور کے قابو سے باہر ہو کر گہری کھائی میں جا گرا جس کے نتیجے میں 5 افراد موقع پر ہی لقمہ اجل بن گئے اور 17 افراد زخمی ہوئے۔ بعد میں مزید 2افراد زخمیوں کی تاب نہ لا کر ہسپتال میں چل بسے۔ حادثہ کے فورا ًبعد مقامی لوگوں، پولیس و سیول انتظامیہ نے امدادی کارروائیاں شروع کیں اور حادثہ کا شکار ہوئے افراد کو گورنمنٹ میڈیکل کالج ڈوڈہ منتقل کیا گیا جہاں ڈاکٹروں نے ایک خاتون سمیت 5 افراد کو مردہ قرار دیا۔مہلوکین کی شناخت محمد اشرف 35ولد اسداللہ وانی، منگتہ وانی 51)ولد غلام وانی، طارق حسین35ولد عبدالجبار، رفیقہ بیگم 60زوجہ عبدالطیف ساکنان عول اور عطا محمد 33ولد غلام محمد ساکن بلی دھار کے طور پر ہوئی ۔ زخمیوں میںمحمد رفیع 26،حکیم محمد 22، غلام محمد 36، عبدالکریم 45، محمد رفیع 27، عبدالرشید 45، مجیب الرحمن 25،ساحل فاروق 17، صائمہ بانو 17، شمہ بیگم 45، شمالہ بیگم 30،عظمی 05، علیظہ 12، عاقب حسین 20، شکرالدین 36، عبدالقیوم 45، کلثومہ 33شامل ہیں۔ 3 شدید زخمیوں کو گورنمنٹ میڈیکل کالج جموں منتقل کیا گیا جہاں پر 5 سالہ عظمیٰ دختر امجد احمد ساکن عول و شکر الدین 36ولد اسداللہ وانی ساکن عول دم توڑ گئے۔ڈپٹی کمشنر ڈوڈہ ہرویندر سنگھ نے کہا کہ بھرت پونڈہ المناک سڑک حادثہ میں انتدائی طور پر 5 افراد جاں بحق و 17 دیگر زخمی ہوئے جس میں 3 کو جی ایم سی جموں منتقل کیا ہے ۔اے سی آر ڈوڈہ اشرف پرویز نے کشمیر عظمیٰ کو بتایا کہ ڈوڈہ بھرت حادثہ میں پہلے 5 افراد جاں بحق اور 17 لوگ زخمی ، جن میں سے 3 کو جی ایم سی جموں منتقل کر دیا گیا،جہاں پر ایک کمسن بچی سمیت 2 افراد دم توڑ گئے ہیں۔ انہوں نے کہا کہ اسطرح سے اس حادثہ میں کل 7 افراد از جان ہو گئے۔
اونتی پورہ
ادھر اونتی پورہ کے بارسو میں ایک دل دہلا دینے والے حادثے میں تین قیمتی جانیں ضائع ہو گئیں۔ یہ حادثہ اس وقت پیش آیا جب ایک آلٹو کار زیر نمبر JK18B-5329ایک ٹرک سے ٹکرا گئی جس کے نتیجے میں آلٹو میں سوار 5افراد شدید زخمی ہوگئے جن میں سے 3کی موت واقع ہوگئی ۔ مہلوکین کی شناخت رؤف لون اور اعجاز احمد لون پسران گل محمد لون ساکن درد گنڈ اور ڈرائیور عبدالرشیدوگے ولد محمد رمضان ساکن یوسرکے طور کی گئی ہے۔ اسی حادثے میں ایک اور شوکت احمد لون اور ان کی اہلیہ دلشادہ شدید زخمی ہوگئے اور انہیں علاج کے لئے سرینگر کے ایس ایچ ایم ایس اسپتال منتقل کردیا گیا ہے۔ روف لون کے بارے میں بتایا جاتا ہے کہ وہ فوج میں کام کر رہا تھا ۔
لیفٹیننٹ گورنر
منوج سنہا نے ضلع ڈوڈہ میں پیش آئے افسوسناک سڑک حادثے میں قیمتی جانوں کے ضیاع پر گہرے رنج و غم کا اظہار کیا ہے۔اپنے تعزیتی پیغام میں لیفٹیننٹ گورنر نے کہا کہ ڈوڈہ میں پیش آئے افسوسناک سڑک حادثے میں جانوں کے ضیاع پر بے حد دکھ ہوا۔غم کی اس گھڑی میں سوگوار خاندانوں سے دلی تعزیت کا اظہار کرتا ہوںاور زخمیوں کی جلد صحتیابی کے لیے دعاگو ہوں۔
وزیر اعلیٰ
وزیر اعلیٰ نے اس المناک واقعے پر گہرے رنج و غم کا اظہار کرتے ہوئے لواحقین سے دلی ہمدردی کا اظہار کیا اور زخمیوں کی جلد صحتیابی کے لیے دعا کی۔وزیر اعلی نے سماجی رابطہ گاہ ایکس پر پوسٹ کرتے ہوئے کہا کہ انتظامیہ کو ہدایت دی گئی ہے کہ تمام متاثرین کو فوری طبی امداد اور ہر ممکن مدد فراہم کی جائے۔
