سرینگر//حریت (گ) چیئرمین سید علی گیلانی اورفریڈم پارٹی جنرل سیکریٹری مولانا محمد عبداللہ طاری نے بمئی سوپور میں فوج کی طرف سے ایک کُنبے پر قہر ڈھانے اور 3خواتین سمیت 4 افراد کو لہو لہان کرنے پر گہری تشویش اور فکرمندی کا اظہار کرتے ہوئے اس واقعے کی غیر جانبدارانہ تحقیقات کرانے اور ملوث اہلکاروں کو قرار واقعی سزا دینے پر زور دیا ہے۔ گیلانی نے کیس درج کرانے اور تحقیقات کرانے کے پولیس دعوے کو یکسر مسترد کیا اور کہا کہ اس طرح کے اعلانات محض ڈھکوسلہ ہوتے ہیں اور ان کا مقصد لوگوں کا غصہ ٹھنڈا کرنا اور انہیں دھوکے میں رکھنا ہوتا ہے، آج تک اس طرح کی کوئی تحقیقات مکمل ہوئی ہے اور نہ کسی ملوث اہلکار کو عدالتِ انصاف تک لایا گیا ہے۔ گیلانی نے بیگم باغ کاکہ پورہ میں بھی اسی نوعیت کے ایک اور واقعے کے پیش آنے کی شدید الفاظ میں مذمت کی اور کہا کہ فوج کو نوے کی دہائی کی طرح پرو ایکٹیو (Pro-active)رول دیا گیا ہے اور وہ نئے سرے سے گاؤں دیہات میں بہت سرگرم ہوگئی ہے۔ گیلانی نے کہا کہ فوج کا نوجوانوں کی مارپیٹ کرنا اور پھر ویڈیو بناکر اُن کو اپ لوڈ کرنا اس حقیقت کا بین ثبوت ہے کہ یہ سب کچھ ایک پالیسی کے تحت عملایا جارہا ہے اور یہ ’’ڈاول ڈاکٹرین‘‘ ہے، جس کو عملی جامہ پہنایا جارہا ہے۔ ادھر مولانا محمد عبداللہ طاری نے کہا کہ افواج اپنی خفت مٹانے کے لئے جس طرح قریہ قریہ میں ظلم و بربریت ڈھارہے ہیں، وہ انتہائی قابل مذمت ہے ۔بومئی سوپور کے متاثرہ گھرانے پر پڑی افتاد پر گہرے دکھ کا اظہار کرتے ہوئے مولانا طاری نے کہا کہ یہ بات ناقابل سمجھ ہے کہ قابض فوج کے اہلکار کیونکر مردم شماری کی آڑ میں من مانیاں کرتے پھرے اور انتظامیہ کو اس بات کے لئے جواب دینا ہوگا کہ فوجیوں کاگھروں میں گھسنے اور مکینوں کی مارپیٹ کس قانون کی رو سے جائز ہے ۔مولاناطاری نے فیاض احمد بٹ اور ان کے گھرانے کی بچیوں کی مارپیٹ اور انہیں شدید زخمی کئے جانے سے اس بات کا عندیہ مل رہا ہے کہ حکام نے اقتدار سے چمٹے رہنے کے لئے مکمل سرنڈر کیا ہے ۔انھوں نے جے پور سنٹرل جیل میں محبوس لطیف احمد واجہ ،عبدالغنی گونی،مرزا نثار حسین اور محمود علی بٹ کو بار بارپیٹا جارہا ہے اور انہیں ایک یا دوسرے طریقے سے ستایا جارہا ہے ۔دریں اثناء تحریک حریت نے بیگم باغ کاکپورہ اور ملحقہ دیہات میں فوج کی زیادتیوں کی مذمت کرتے ہوئے کہا کاکہ پورہ میں قائم فوجی کیمپ کے اہلکاروں نے بیگم باغ کی بستی میں گھس کر کئی مکانوں پر چھاپے دالے اور جوانوں کو زدوکوب کیا، جبکہ بدھ کی صبح بھی فوج نے بستی میں داخل ہوکر راہ چلتے جوانوں کی مارپیٹ کی جس سے کچھ جوان زخمی ہوئے۔ مسلم پولٹیکل لیگ چیئرمین فاروق احمد توحیدی نے بمئی سوپور میں ایک گھر میں گھس کر نہتے مکینوں کی مارپیٹ خاصکر خواتین کے ساتھ بدتمیزی اور اُنہیں تشدد کا نشانہ بنانے کی شدید الفاظ میں مذمت کی۔
’ڈوول ڈاکٹرین‘ کا حصہ
