محمد تسکین
بانہال// بانہال کے ٹھاچی علاقے میں ممبر اسمبلی بانہال حاجی سجاد شاہین کی طرف سے عوام کے نام وقف کی گئی نگر ون ڈوبا پارک میں محکمہ جنگلات رینج بانہال کے اشتراک سے کھاہ رائٹرس ایسوسی ایشن جموں و کشمیر کی طرف سے ایک محفل مشاعرہ کا انعقاد گیا اوراور ممبر اسمبلی کے ہاتھوں کھاہ زبان میں دو کتابوں کی رسم رونمائی انجام دی گئی اور کھاہ زبان کی ایک ویب سائٹ کو ممبر اسمبلی کے ہاتھوں لانچ کیا گیا ۔اس موقع پر ممبر اسمبلی بانہال-گول جناب حاجی سجاد شاہین مہمانِ خصوصی کی حیثیت سے شریک ہوئے، جب کہ محکمہ جنگلات کے اعلیٰ افسران، سماجی شخصیات، اور کھاہ زبان و ادب سے وابستہ کئی اہم افراد بھی تقریب میں موجود تھے۔ اس ادبی مجلس میں کھاہ زبان و ادب کے کہنہ مشق شاعر و ادیب و گلوکار نے اپنے کلام سے سینکڑوں لوگوں کو محظوظ کیا ۔ اس ادبی محفل میں کچھ کتابوں کی رسم اجرائی کی گئی اور ایک ویب سائٹ بھی لانچ کی گئی ۔ اس ادبی محفل میں کھاه زبان و ادب اور قدیم كهاشا قوم کے ماضی حال اور مستقبل اور اس کے تحفظ اور نشر و اشاعت کے بارے میں غور وفکر کیا گیا اور اہم معاملات پر روشنی ڈالی گئی ۔کھاه رائٹرس ایسوسی ایشن جموں و کشمیر کے ایک بیان کے مطابق پروگرام کا اہم حصہ محفلِ مشاعرہ تھا جس میں کھاہ زبان کے معروف شعراء نے اپنا کلام پیش کر کے حاضرین کو محظوظ کیا اور زبان کے ثقافتی ورثے کو محفوظ کرنے کی ایک عمدہ کوشش کی۔
