حسیب اے درابو
آئینی تنزلی اور قانون سازی سے محرومی کے علاوہ، جموں و کشمیر کی مقننہ کی فعال عوامی رسائی کو بھی عوامی نمائندوں کی ایک نئی اور انوکھی پرت ڈسٹرکٹ ڈیولپمنٹ کونسلز (DDCs) کی تخلیق کے ذریعے محدود کر دیا گیا ہے جن کا انتخاب آفاقی بالغ رائے دہی پر ہوتا ہے۔
ڈی ڈی سیزکے براہ راست انتخابات ہندوستانی پارلیمانی جمہوریت کے ادارہ جاتی ڈھانچے کی روح کی خلاف ورزی ہیں جس میں شہری براہ راست صرف تین درجوں کے نمائندوں کو منتخب کرتے ہیں جو آئین میں فراہم کی گئی ہیں – پارلیمنٹ، قانون ساز اسمبلیاں اور پنچایتیں/شہری بلدیاتی ادارے۔
ڈی ڈی سیزقانونی ادارے بھی نہیں ہیں، جو کہ جموںوکشمیرپنچایتی راج ایکٹ 1989میں ترمیم کرکے ایک ایگزیکٹو آڈرکے ذریعے بنائے گئے ہیں۔ اس کے باوجود اب ایک براہ راست منتخب ادارہ ہونے کے ناطے، بطور ادارہ یہ اجتماعی طور پرقانون ساز اسمبلی کی تقدس کو کم کرتے ہیں اور اس کی افادیت میں رکاوٹ ہیں۔
ڈ ی ڈی سیزکے پہلے انتخابات 2020میں ریاستی الیکشن کمیشن کے ذریعے آٹھ مرحلوں میں کرائے گئے تاکہ ایک ضلع کے علاقائی حلقوں سے براہ راست چودہ ممبران کا انتخاب کیا جا سکے۔ اب قانون ساز اسمبلی کے وجود میں آنے کے بعد، جن ممبران اسمبلی کے حلقے ضلع کے اندر ہیں وہ ڈی ڈی سی کے فطری رکن بن جاتے ہیں۔ایسا ہی ضلع کے تمام بلاک ترقیاتی کونسلوں کے چیئرپرسنزکے ساتھ بھی ہوگا۔تمام اراکین کو ووٹنگ کے مساوی حقوق حاصل ہیں، اس لیے ایک ایم ایل اے کے ساتھ ڈی ڈی سی کے ممبر یا شاید اس کے برعکس سلوک کیا جاتا ہے۔ اہم معاملات میں، جیسے کیپیکس پلان کی منظوری میں ایم ایل اے کے پاس کوئی اختیاربھی نہیں ہے۔ یہ خود منتخب نمائندوں کے درمیان دشمنی کے تعلقات کی راہیں ہموارطے کرتا ہے۔
تعجب کی بات نہیں کہ جب عمر عبداللہ نے گاندربل ضلع کے ترقیاتی جائزہ میٹنگ کی صدارت کی تو ڈی ڈی سی چیئرپرسن نے اجلاس کا بائیکاٹ کیا۔ بیوروکریسی، جس کے ایک سے زیادہ آقا ہیں، بھی بدتمیزی کر رہے ہیں۔ جموں میں افسروں کی غیر موجودگی کی وجہ سے ڈی ڈی سی چیئرمین اور ممبران نے خود اپنی میٹنگ نہیں کی۔
مضمرات انتظامی خرابی سے آگے جاتے ہیں۔ 20ڈی ڈی سیز میں سے ہر ایک کو براہ راست منتخب کر کے، جموں و کشمیر میں قانون ساز جمہوریت کے موجودہ ڈھانچے کو مؤثر طریقے سے نئے سرے سے ڈیزائن کیا گیا ہے۔ ڈی ڈی سی اب عملی طور پر “ضلعی اسمبلیاں” ہیں جو نہ تو ہندوستان کے آئین میں فراہم کی گئی ہیں اور نہ ہی انتخابات کا براہ راست طریقہ طے کیا گیا ہے۔ اس کے باوجود ڈی ڈی سی کو حکمرانی کے تیسرے درجے پر رکھا گیا ہے۔
2020میں ڈی ڈی سی کی تشکیل سے پہلے، 2019میں تمام اضلاع میں ضلع ترقیاتی بورڈز کو ختم کر دیا گیا تھا اورجموںوکشمیرپنچایتی راج ایکٹ l989کی دفعات کے تحت تمام بلاکوں اور اضلاع میں بلاک ڈیولپمنٹ کونسلز اور ڈسٹرکٹ پلاننگ اینڈ ڈیولپمنٹ بورڈ تشکیل دئے گئے تھے۔یہ ادارے، جو پورے ملک میں موجود ہیں، اپنے کردار، افعال اور مالیات میں ترقی پذیر ہیں۔ ان کو ضلع میں ترقیاتی انتظامیہ کیلئے اعلیٰ ادارہ سمجھا جا سکتا ہے۔ دیگر ریاستوں میں بھی، ضلعی بورڈ کے اراکین کا انتخاب سرپنچوں کی کونسل کے ذریعے کیا جاتا ہے جو پنچایتوں کی نمائندگی کرتے ہیں۔ سرپنچوں کے ذریعہ ضلعی بورڈ کے ارکان کا یہ بالواسطہ انتخاب، جمہوری غیر مرکوزیت اور ترقیاتی انتظامیہ کے درمیان واحد ادارہ جاتی لنک اور اختیار فراہم کرتا ہے۔ لیکن اس اہم لنک کو اب جموں و کشمیر میں نئے فریم ورک میں نظرانداز کردیا گیا ہے۔
اس کے بجائے، ڈی ڈی سیزحکمرانی کی ایک اورپرت کا اضافہ کرتے ہیںگوکہ یہ نیم قانون سازادارے نہیں ہیں۔ڈی ڈی سیز کے لئے براہ راست انتخابات کئی وجوہات کی بناء پر مسائل پیدا کرنے والے ہیں۔ سب سے پہلے، یہ جمہوریت کے بنیادی اصول کی خلاف ورزی کرتے ہیں یعنی “ایک شخص ایک ووٹ”۔ پارلیمانی یا قانون ساز حلقوں کی حد بندی کا بنیادی اصول یہ ہے کہ ملک کے کسی بھی حصے میں رہنے والے کو نمائندوں کے انتخاب میں یکساں اہمیت حاصل ہوگی۔ یہاں تک کہ پنچایتوں کے معاملے میں، علاقے کو اس طرح تقسیم کیا گیا ہے کہ ہر پنچایت حلقے کی آبادی اور الاٹ کی گئی نشستوں کی تعداد کے درمیان تناسب قابل عمل حد تک یکساں ہے۔
اس کے برعکس، کوئی ضلع اپنے جغرافیہ یا آبادی کے لحاظ سے کتنا بڑا یا چھوٹا کیوں نہ ہو، اس کے ڈی ڈی سی میں منتخب نمائندوں کی تعداد اتنی ہی ہوتی ہے۔ مثال کے طور پر12لاکھ سے زیادہ آبادی کے ساتھ سری نگر ضلع میں 14نمائندے ہیں، اتنے ہی کشتواڑضلع میںہیں حالانکہ اس ضلع کی آبادی 2.5لاکھ سے کم ہے۔ رقبہ کے لحاظ سے ڈوڈہ کا تقریباً 9,000مربع کلومیٹر اور گاندربل کا بمشکل 250مربع کلومیٹر برابر ہے لیکن نمائندوں کی تعداد یکساں ہے۔ فی کس نمائندہ طاقت میں اتنا وسیع تغیر ملک میں کہیں نہیں ہے۔
دوم، ڈی ڈی سی کے براہ راست انتخابات عوام کے نمائندے کے طور پر ذیلی قومی قانون ساز اسمبلی (موجودہ یوٹی یا مستقبل میں ریاست) کی برتری کو کمزور کرتے ہیں۔یہ اس حد تک کہ یہ ایسا کرتے ہیں کہ یہ منتخب ڈی ڈی سی وفاقی نظام کے دوسرے درجے کے بنیادی حصے کو بے اختیار کر دے گا۔ ہندوستان کی ہر ریاست اور درحقیقت دنیا کی ہر ذیلی حکومت کے پاس آئینی حیثیت، قانون سازی کی اہلیت، ترقیاتی کردار اور انتظامی اختیار ہے۔کشمیر میں یہ امتیازات تیزی سے اپنے معنی کھو رہے ہیں۔
بیوروکریٹک غیر مرکوزیت اورجمہوری غیر مرکوزیت کی لڑائی میں ڈی ڈی سی قانون سازی کی منظوری کے حامل کسی بھی اقدام کو روکنا آسان بنا سکتے ہیں۔ یہ جموں و کشمیر کے اندر جغرافیائی تقسیم کو بھی واضح کرے گا۔ انارکی نہیں تو حالات افراتفری کا شکار ہوں گے۔
عوام کے ذریعے براہ راست منتخب ہونے کے جمہوری اختیار کی حمایت سے ڈی ڈی سیزانفرادی اور اجتماعی طور پر ریاستی اسمبلی کے متوازی ایک ادارہ بننے کی صلاحیت رکھتے ہیں۔ یہ دیکھنا مشکل نہیں ہونا چاہئے کہ اس کم تر لیگ کے 280ایم ایل ایز کے ساتھ یہ 20 “ضلعی اسمبلیاں” کس طرح اہم سیاسی مسائل کے ساتھ ساتھ ترقیاتی حکمت عملی پر ریاستی اسمبلی کو کالعدم یا مسترد کرنے کے لیے ادارہ جاتی ڈھانچہ فراہم کریں گی۔ یہ ایک ایسا نظام ہے جو ریاست کی قانون ساز اسمبلی کو کمزور کرنے کیلئے بنایا گیا ہے۔
اس کے علاوہ، ایک واضح حقیقی سیاسی مقصد ہے جو براہ راست منتخب ڈی ڈی سیز کی تشکیل پورا کرے گا۔ یہ نیا نظام، اپنی پوزیشننگ اور اختیارات کے پیش نظروقت کے ساتھ ساتھ سیاسی گفتگو کو خصوصی حیثیت کی بحالی اور یہاں تک کہ ریاستی حیثیت سے مقامی ترقیاتی مسائل اور روزمرہ کے معاملات تک تبدیل کر دے گا۔ دوسرے الفاظ میں، قابل انتظام مطالبات تک ان کو تبدیل کریںگے۔
وفاقی نقطہ نظر سے، جس کا انحصار حکمرانی کے اختیارات کی سطح کے توازن پر ہے، غیر مرکوزیت کی آڑ میں بے اختیاری کا ایک فریم ورک بنایا جا رہا ہے۔ ایک اور سطح پر،انضباطی کنٹرول کو مرکزی بنا کر ریاستوں/ مرکز کے زیر انتظام علاقوں کو اوپر سے نچوڑا جا رہا ہے۔گورننس یا حکمرانی کی دوسری پرت چکی کے دو پاٹوں میںپھنس چکی ہے ۔وفاق اس کو اوپر سے نچوڑ رہی ہے اور بلدیاتی ادارے نیچے سے کھوکھلا کررہے ہیں۔
پروٹو ڈیموکریٹک اداروں سے بہت دور جو نچلی سطح پر جمہوریت کو مضبوط کریں گے، یہ انتخابی نمائندہ جمہوریت کا خاتمہ ہے۔ یہ نیا نظام ترقی اور مقامی خود حکومت کے ذریعے اس کی فراہمی دونوں میں کمی کر دے گا جس کی ترسیلات اور مینڈیٹ سے سمجھوتہ کیا گیا ہے۔
عقابی نگاہ سے دیکھاجائے تو گورننس کی ایک اور پرت کو ٹھونسناجمہوری غیر مرکوزیت اور انتظامی غیرمرکوزیت کے درمیان خطوط کو دھندلا کر رہا ہے۔ اس کی نہ ختم ہونے والی مخلوط تہوں اور انتظامی حد بندیوں کی تہوں کے ساتھ یہ نظام اور اس کا ڈھانچہ اتنا پیچیدہ ہو جائے گاکہ کوئی بھی بہترین ارادے کے باوجود ترقی ڈلیور نہیں کر سکے گا۔
رابطہ۔[email protected]
