۔34کروڑ روپے کی مشینری گرد آلود،صرف 8ملازم عارضی بنیادوں پر تعینات
پرویز احمد
سرینگر // جموں و کشمیر کے گیٹ وے لکھن پور میں قائم ڈرگ ٹیسٹنگ لیبارٹری عملے کی عدم دستیابی کی وجہ سے غیر فعال اور مفلوج ہے۔ 34کروڑ روپے کی مرکزی معاونت سے بنائی گئی یہ جدید لیبارٹری دھول چاٹ رہی ہے۔ مارچ 2023سے شروع کی گئی لیبارٹری میں سالانہ صرف 2ہزار ٹیسٹ ہی ہو پارہے ہیں جبکہ لیبارٹری کی اصل صلاحیت سالانہ 5ہزارہے۔ انتظامیہ کی بے حسی حد یہ ہے کہ 2سال کا طویل عرصہ گذر نے کے باوجود بھی ادویات کی جانچ کیلئے بنائی گئی لیبارٹر ی میں ابھی تک مستقل عملے کی تعیناتی عمل میں نہیں لائی گئی ہے۔سینکڑوں دوا ساز کمپنیوں کی کروڑوں مالیت کی ادویات ہر روز جموں و کشمیر کے حدود میں لائی جاتی ہیں لیکن انکی جانچ کرنے کیلئے عارضی بنیادوں پر 10افراد کو تعینات کیا گیا ہے۔ یہ عملہ تربیت یافتہ ہے یا نہیں، ڈرگ ٹیسٹنگ لیبارٹری میں اہم ذمہ داریاں نبھانے کیلئے عملے کتعینات کیوں نہیں ہے، اسکا جواب کسی کے پاس نہیں ہے۔جموں و کشمیر کے محکمہ صحت کی کارکردگی کا اندازہ اس بات سے لگایا جاسکتا ہے کہ ادویات مارکیٹ میں آنے کے بعد انکے نمونے حاصل کئے جاتے ہیں، اور تب تک ہزاروں لوگوں نے غیر معیاری ادویات کا استعمال کیا چکا ہوتا ہے۔ مرکزی سرکار کی معاونت سے بنائی گئی اس لیبارٹری میں عام تشخیصی آلات کے علاوہ 6کروڑ روپے کی تین جدید مشینیں بھی نصب ہیں۔جن میں آئی سی پی۔ ایم ایس (Inductively coupled plasma mass spectrometry)، ایل سی۔ ایم (Liquid chromatography-mass spectrometry) اور جی سی۔ ایم سی ( Gas chromatography/Mass spectrometry) شامل ہیں۔ سال 2024میںلیبارٹری میں صرف 1968نمونوں کی تشخیص ممکن ہوسکی ہے جن میں 11نمونوں کو غیر معیاری اور 11 میں غلط لیبلنگ پائی گئی۔ذرائع نے بتایا کہ کٹھوعہ لیبارٹری میں 25مستقل ملازمین کی تعیناتی کی تجویز تھی، لیکن پچھلے دو سال سے کسی بھی ملازم کی تعیناتی عمل میں نہیں لائی گئی ہے۔ ابتدائی دنوں میں لیبارٹری کیلئے ڈرگ کنٹرول آرگنازیشن جموں سے 2اور کشمیر سے 3ملازمین کو تعینات کیا جاتا تھا لیکن لیباٹری مکمل ہونے کے بعد مستقبل ملازمین کی تعیناتی کیلئے سرکار کو سفارشات بھیجی گئی لیکن ابھی تک کوئی بھرتی نہیں ہوئی ہے۔ سٹیٹ ڈرگ کنٹرول جموں و کشمیر لوٹیکہ کھجوریہ نے کشمیر عظمیٰ کو بتایا کہ لیبارٹری میں بھرتی عمل شروع کیا گیا ہے اور دونوں لیبارٹریوں کو مزید توسیع دینے کا منصوبہ بھی ہے۔ انہوں نے کہا کہ لکھن پور لیبارٹری میں جدید طرز کے آلات نصب ہیں اور ان آلات سے ہم ادویات کے 20پیرامیٹروں کی جانچ کرسکتے ہیں۔ انہوں نے کہا کہ لیبارٹری کے شروع ہونے سے ٹیسٹنگ صلاحیت 7500تک پہنچ گئی ہے جو بھارت کی دیگر ریاستوں کے برابر ہے۔ انہوں نے کہا کہ ہماری ٹیسٹنگ صلاحیت کئی دیگر ریاستوں سے زیادہ ہے۔
