عظمیٰ نیوزسروس
دبئی//چیمپئنز ٹرافی 2025 کے گروپ اے کے میچ میں بھارت نے بنگلہ دیش کو 6وکٹوں سے ہرادیا۔ بنگلہ دیش کے توحید ہریدوئی کے بعد بھارت کے شمبن گل نے بھی سنچری بناڈالی۔ بنگلہ دیش کی جانب سے دیا گیا 229 رنز کا ہدف بھارت نے 47ویں اوور میں 4 وکٹوں کے نقصان پر حاصل کرلیا۔دبئی کرکٹ اسٹیڈیم میں بنگلہ دیش نے ٹاس جیت کر پہلے بیٹنگ کرنے کا فیصلہ کیا جسے بھارتی بولرز نے ابتدا میں ہی غلط ثابت کردیا۔بھارتی بولرز نے 9ویں اوور میں ہی بنگلہ دیش کی آدھی ٹیم کو صرف 35رنز پر پویلین بھیج دیا۔ان ابتدائی پانچ کھلاڑیوں میں تنزید حسن نے 25 رنز بنائے، مہدی حسن میراز 5 جبکہ سومیا سرکار، کپتان نجم الحسن شانتو اور تجربہ کار مشفق الرحیم بغیر کوئی رن بنائے پویلین لوٹے۔تاہم چھٹی وکٹ پر بنگلہ دیشی بیٹرز توحید ہردوئے اور جاکر علی 154 رنز کی پارٹنرشپ بنائی اور اپنی ٹیم کو ایک قابل دفاع ٹوٹل تک پہنچانے میں کلیدی کردار ادا کیا۔ جاکر 68 رنز کی اننگز کھیل کر آؤٹ ہوئے تو توحید نے ٹیل اینڈرز کے ساتھ رنز بنانے کا سلسلہ جاری رکھا۔ اس دوران توحید ہردوئے پٹھوں میں کھنچاؤ کا شکار ہوئے، اس کے باوجود انہوں نے 49ویں اوور میں اپنی سنچری مکمل کی۔تاہم آخری اوور میں وہ بنگلہ یش کے آؤٹ ہونے والے آخری کھلاڑی تھے جس کے ساتھ ہی بنگلہ دیشی ٹیم 228 رنز پر آل آؤٹ ہوگئی۔ بھارت کی جانب سے محمد شامی نے 5وکٹیں لیں، ہرشت رانا نے 3جبکہ اکشر پٹیل نے دو کھلاڑیوں کو آؤٹ کیا۔ہدف کے تعاقب میں بھارت تیز رفتار آغاز فراہم کیا، اوپنر شبمن گل اور کپتان روہیت شرما کے درمیان پہلی وکٹ پر 69رنز کی پارٹنرشپ بنی، جہاں 10ویں اوور میں اپنے کیریئر کے 11ہزار رنز مکمل کرنے والے روہیت شرما 41رنز بنا کر آؤٹ ہوئے۔بعدازاں ویرات کوہلی نے 22، شریاس ائیر نے 15جبکہ اکشر پٹیل نے 8رنز بنا کر شبمن گل کا ساتھ دیا۔ تاہم پانچویں وکٹ پر شبمن گل اور کے ایل راہول کے درمیان ناقابلِ شکست 87رنز کی پارٹنرشپ نے بنگلہ دیش کی جیت کی امید پر پانی پھیر دیا۔اس دوران شمبن گل نے سنچری مکمل کی، وہ 101 جبکہ کے ایل راہول 41 رنز بنا کر ناٹ آؤٹ رہے۔ بنگلہ دیش کی جانب سے رشد حسین 2 وکٹیں لے کر نمایاں بولر رہے جبکہ تسکین احمد اور مستفیض الرحمان نے ایک ایک وکٹ لی۔
