یو این آئی
نئی دہلی//نئے چیف الیکشن کمشنر گیانش کمار اور الیکشن کمشنر ڈاکٹر وویک جوشی نے بدھ کے روز یہاں اپنے عہدے کا چارج سنبھال لیا ۔گیانیش کمار ہندوستان کے 26ویں چیف الیکشن کمشنر ہیں انہوں نے
راجیو کمار کی جگہ لی جن کی میعاد منگل کے روز ختم ہوگئی۔ گیانیش کمار کا الیکشن کمیشن ہیڈ کوارٹر میں الیکشن کمشنروں ڈاکٹر سکھبیر سنگھ سندھو اور ڈاکٹر وویک جوشی نے خیرمقدم کیا۔ چیف الیکشن کمشنر گیانیش کمار نے اپنی نئی ذمہ داری سنبھالنے کے بعد شہریوں بالخصوص نوجوان شہریوں کے نام مختصر پیغام میں کہا کہ انہیں ووٹ ڈالنے کی اپنی ذمہ داری پوری کرنی چاہئے۔ انہوں نے اسے ملک کی خدمت کی طرف پہلا قدم قرار دیا۔ گیانیش کمار نے کہا کہ ووٹ ڈالنا ملک کی خدمت کی طرف پہلا قدم ہے اور اس لئے ہندوستان کے ہر شہری جو 18 سال کی عمر کو پہنچ چکا ہے اسے ووٹر بننا چاہئے اور الیکشن کمیشن ہندوستان کے آئین، عوامی نمائندگی ایکٹ، قوانین اور ان کے تحت جاری کردہ ہدایات کے مطابق ہمیشہ ووٹروں کے ساتھ رہا ہے، ہے اور رہے گا۔ادھرانڈین ایڈمنسٹریٹو سروس (آئی اے ایس)افسر ڈاکٹر وویک جوشی نے بدھ کو الیکشن کمیشن آف انڈیا میں الیکشن کمشنر کا چارج سنبھال لیا۔ڈاکٹر جوشی ہریانہ کیڈر کے 1989 بیچ کے آئی اے ایس افسر ہیں۔ انہوں نے ہریانہ حکومت کے چیف سکریٹری اور مرکز میں محکمہ عملہ اور تربیت اور مالیاتی خدمات کے محکمے کے سکریٹری کے طور پر خدمات انجام دی ہیں۔اپنے طویل کیریئر کے دوران انہوں نے رجسٹرار جنرل اور مردم شماری کمشنر آف انڈیا اور ریاست ہریانہ میں پانچویں ریاستی مالیاتی کمیشن کے ممبر سکریٹری کے طور پر بھی خدمات انجام دیں۔اتر پردیش کے رہنے والے ڈاکٹر جوشی آئی آئی ٹی روڑکی سے مکینیکل انجینئر ہیں اور انہوں نے آئی آئی ایف ٹی، نئی دہلی سے بین الاقوامی کاروبار میں ماسٹرز اور گریجویٹ انسٹی ٹیوٹ، جنیوا (سوئٹزرلینڈ) سے انٹرنیشنل اکنامکس میں ایم اے اور ڈاکٹریٹ کی ڈگری حاصل کی ہے۔
