سرینگر//دارالخیر میرواعظ منزل سرینگرنے چھتہ بل سرینگرمیں گزشتہ دنوںآتشزدگی کی ایک بھیانک واردات میں چار رہائشی مکانات کے خاکستر ہونے پر دکھ اور افسوس کا اظہار کیا۔ دارالخیر کے سرپرست میرواعظ محمد عمر فاروق کی طرف سے متاثرین کے ساتھ دلی ہمدردی اور یکجہتی کا اظہار کیا ہے اور متاثرین کی کمزور مالی حالت کے پیش نظر ان کی فوری باز آبادکاری کی ضرورت پر زور دیا۔دارالخیر نے عوام سے دردمندانہ اپیل کی ہے کہ موسم سرما میں گرمی حاصل کرنے کے آلات گیس،ہیٹر، بوائلر، پاور کمبل اور کانگڑی وغیرہ استعمال کرتے وقت احتیاط برتنے کی کوشش کریں تاکہ ممکنہ حد تک ناگہانی آفات اور آتشزدگی کے بڑھتے ہوئے افسوسناک واقعات سے بچا جاسکے۔اس دوران دارالخیر میرواعظ منزل کے ایک وفدنے مفتی غلام رسول سامون کی قیادت میں چھتہ بل سرینگر جاکر متاثرہ کنبوں میں چاول ، آٹا،کمبل اور کچن کٹ اور بنیادی ضروریات کی چیزیں بطور امداد پیش کیں اور ان کے ساتھ ہمدردی اور یکجہتی کا اظہار کیا ۔ وفد نے رعناواری سرینگر جاکر ایک اور متاثرہ کنبے کو امدادی سامان فراہم کیا اور ان کے ساتھ ہمدردی کا اظہار کیا۔اس موقعہ پر دارالخیر میرواعظ منزل نے یہ بات پھر واضح کی کہ کشمیری عوام اس حقیقت سے باخبر ہے کہ دارالخیر میرواعظ منزل اپنے قیام کی مدت سے لیکر آج تک برابر اپنے مخلصین کی مالی اور جنسی معاونت سے برا بر آفات کے دوران بلا امتیاز مذہب و ملت متاثرین کی حتی المقدور امداد اور بحالی کیلئے اپنی کوششوں میں مصروف عمل ہے۔ اس ضمن میں دارالخیر میرواعظ منزل نے اہل ثروت افراد سے ماضی کی طرح اس ادارے کی ہر ممکن مدد اور معاونت کی اپیل دہرائی ہے تاکہ امدادی کام جاری رکھے جاسکیں۔
چھتہ بل میں حالیہ ہولناک آتشزدگی کے متاثرین دارالخیر کی جانب سے امدادی کاروائی ، ضروری سامان اور گرمی کے آلات فراہم
