عاصف بٹ
کشتواڑ//چھاتروکشتواڑ ضلع کے دور افتادہ جنگلاتی علاقے میں ہفتہ کی شام ملی ٹینٹوں اور سیکورٹی فورسز کے درمیان مسلح تصادم کے بعد تلاشی کارروائی اتوار دوسرے روز بھی جاری رہی۔سیکورٹی ذرائع نے نے سنیچر کی رات دیر گئے اس بات کا دعویٰ کیا تھا کہ غیر مصدقہ طور پر ایک ملی ٹینٹ مارا گیا، لیکن بعد میں اسکی تصدیق نہیں کی۔سیکورٹی حکام نے بتایا کہ مسلح تصادم اس وقت شروع ہوا جب سنیچر کی شام 11آر آر اور پولیس نے 3ملی ٹینٹوں کی موجودگی کی اطلاع کے بعد چھاترو کے گوری نالہ منڈو جنگلاتی علاقے میں تلاشی مہم شروع کی۔ان کا کہنا تھا کہ شام پونے سات بجے علاقے میں طرفین کے درمیان فائرنگ کا تبادلہ ہوا جو قریب 30منٹ تک جاری رہا۔اس کے بعد شام ڈھلتے ہی آپریشن شروع کیا گیا، لیکن اسکے بعد طرفین کے درمیان کوئی آمنا سامنا نہیں ہوا۔اسی علاقے میںپنگلناڑ کے مقام پر 13ستمبرکو سیکورٹی فورسز پر ملی ٹینٹوں نے گھات لگا کر حملہ کیا، جس کے دوران ایک جونیئر کمیشنڈ آفیسر سمیت 2فوجی ہلاک جبکہ دو دیگر زخمی ہوئے تھے۔پولیس نے اتوار کو بتایاکہ علاقے میں سیکورٹی فورسز اور ملی ٹینٹوں کے درمیان تصادم جاری ہے۔X پر سوشل میڈیا ہینڈل کو لے کر، کشتواڑ پولیس نے پوسٹ کیا، “سیکورٹی فورسز کی طرف سے چھاترو کے بالائی علاقوں ڈنا دھر جنگلات کے قریب شروع کیے گئے پہلے مشترکہ تلاشی آپریشن کے تسلسل میں رابطہ قائم ہونے پر فائرنگ دوبارہ شروع ہو گئی اور دونوں طرف سے فائرنگ کا تبادلہ ہوا۔ادھربی ایس ایف نے جموں کے آر ایس پورہ سیکٹر میں درندازی کی ایک کوشش کو ناکام بناکر بھاری مقدار میں اسلحہ و گولی بارود ضبط کرنے کا دعویٰ کیا ہے ۔ ادھر پونچھ میں سیکورٹی فورسز نے کنٹرول لائن کے قریب پھٹے ہوئے نوٹوں کے ساتھ پاکستانی شہری کو گرفتار کیا ہے ۔ آر ایس پورا سیکٹر میں بین الاقوامی سرحد کے قریب ہتھیاروں اور گولہ بارود کا ایک بڑا ذخیرہ برآمد کرتے ہوئے دراندازی کی کوشش کو ناکام بنایا گیا۔ انہوں نے کہا ’’ 21اور 22ستمبر کی درمیانی رات دراندازوں نے گھسنے کی کوشش کی لیکن للکارنے کے بعد وہ واپس چلے گئے۔وہاں تلاشی آپریشن کے دوران 2 پستول، 4 رسالے، 9 ملی میٹر گولہ بارود کے 20 راؤنڈ، ایک AK47رائفل؛ 2 میگزین، گولہ بارود کے 17 راؤنڈبر آمد کر لئے گئے ۔ ادھر فوج نے اتوار کو پونچھ ضلع میں 35 سالہ پاکستانی شہری کو 1800 روپے کے علاوہ 10 روپے کے پھٹے ہوئے نوٹ سمیت گرفتار کیا۔ دفاعی ترجمان کے مطابق کنٹرول لائن کے قریب پونچھ سیکٹر میں پاکستانی شہری گرفتارہواجس کی شناخت حسام شہزاد ولد شہزاد احمد خان ساکن ٹیٹرینیٹ پاکستان کے طور پر ہوئی ۔ انہوں نے مزید بتایا کہ اس کی تلاشی لینے پر 1800 روپے کی پاکستانی کرنسی اور 10 روپے کا ایک پھٹا ہوا نوٹ برآمد ہوا۔اس کے علاوہ اس کے بٹوے سے پاکستان نیشنل آئی کارڈ کی فوٹو کاپی اور دو موب سمز، ایک چابی ملی تاہم ان کا کہنا تھا کہ اس کے قبضے سے کوئی اسلحہ وغیرہ برآمد نہیں ہوا۔
