چنینی۔ ناشری ٹنل میں مسافر گاڑی پلٹ گئی بی ایس ایف اہلکارہلاک،کٹھوعہ حادثہ میںآفیسر فوت

محمد تسکین

بانہال // ہفتے کی صبح جموں سرینگر قومی شاہراہ پر واقع ساڑھے آٹھ کلومیٹر لمبے چنینی۔ ناشری ٹنل کے اندر پیش آئے سڑک کے ایک حادثے میں ایک بی ایس ایف اہلکار اس وقت ہلاک ہوگیا جب مسافروں سے بھری ایک تیز رفتار زائیلو گاڑی ٹنل کے اندر پلٹ گئی۔پولیس حکام کا کہنا ہے کہ یہ زائیلو گاڑی نمبر JK-01T/ 7905 وادی کشمیر سے جموں کی طرف جارہی تھی اور تیز رفتار کی وجہ سے ڈرائیور سپنا قابو کھو بیٹھا اور گاڑی زوردار طریقے سے ٹنل کے اندر پلٹ گئی۔ انہوں نے کہا کہ اس میں سوار دیگر مسافر معمولی چوٹوں کے ساتھ بچ نکلے ہیں۔ پولیس نے مرنے والے بی ایس ایف اہلکار کی شناخت 30 سالہ امیت کمار شکلا ولد اوپیندر شکلا سکنہ ریاست جھارکھنڈ کے طور کی ہے اور بارڈر سیکورٹی فورس کی 26 ویں بٹالین سے وابستہ تھا اور چھٹی پر گھر جا رہا تھا۔مہلوک اہلکارکی لاش کو کمیونٹی ہیلتھ سینٹر چنینی منتقل کیا گیا جہاں سے پولیس کی نگرانی میں ضروری لوازمات کے بعد لاش کو اپنے آبائی علاقے کی طرف بھیجا جا رہا ہے۔ پولیس نے کیس درج کرکے معاملے کی تحقیقات شروع کردی ہے ۔ادھربی ایس ایف ترجمان نے کہا کہ کٹھوعہ ضلع کے راجباغ علاقے میں ایک گاڑی سڑک سے پھسل کر حادثے کی شکار ہوئی جس دوران ہماچل پردیش کے رہنے والے اے ایس آئی پرشوتم سنگھ ا اپنی جان سے ہاتھ دھو بیٹھے، جبکہ ان کے دو ساتھیوں کو بچا لیا گیا ۔ انہوں نے بتایا کہ سنگھ کار چلا رہا تھا جب وہ جسروٹا سے راج باغ جاتے ہوئے گاڑی پر سے کنٹرول کھو بیٹھا۔انہوں بتایا کہ بچائو کارورائی میں بی ایس ایف کے دو اہلکاروں کی جان بچانے میں کامیاب ہو گئے لیکن سنگھ کو نازک حالت میں پایا گیا اور اسے ہسپتال بھیجا گیا جہاں ڈاکٹروں نے اسے مردہ قرار ددیا ۔