عظمیٰ نیوزسروس
جموں//حکام نے جموں و کشمیر کے ضلع ریاسی میں سلال ڈیم کے متعدد سپل وے گیٹ کھول دیے ہیں کیونکہ خطے میں شدید بارش کے بعد دریائے چناب میں پانی کی سطح میں مسلسل اضافہ ہو رہا ہے۔حکام نے ایڈوائزری جاری کی ہے جس میں مقامی لوگوں پر زور دیا گیا ہے کہ وہ دریا کے کناروں سے دور رہیں اور تمام حفاظتی ہدایات پر عمل کریں۔اضافی پانی کو محفوظ طریقے سے خارج کرنے اور نیچے کی طرف آنے والے کسی بھی ممکنہ سیلاب کو روکنے کے لیے دروازے کھولے گئے تھے۔ایک سابقہ رپورٹ کے مطابق جموں و کشمیر کے مختلف حصوں میں شدید بارشوں کے نتیجے میں دریائے چناب کے پانی کی سطح میں اضافہ ہوا، جس سے بگلیہار ہائیڈرو الیکٹرک پاور پروجیکٹ میں اوور فلو ہو گیا۔ڈوڈہ کشتواڑ رام بن رینج کے ڈپٹی انسپکٹر جنرل شریدھر پاٹل نے صورت حال کو تسلیم کیا اور لوگوں سے دریاؤں اور بہنے والی ندیوں سے دور رہنے کی اپیل کی۔ ڈی آئی جی پاٹل نے کہا “آپ سب نے دیکھا ہو گا کہ دریائے چناب میں پانی کی سطح میں اضافہ ہوا ہے۔ ایک واقعہ ڈوڈہ ضلع میں بھی ہمارے علم میں آیا ہے، جس میں کچھ لوگوں کی جانیں بھی گئی ہیں۔ میں تمام لوگوں سے اپیل کرتا ہوں کہ دریاؤں کے قریب نہ جائیں۔ پانی کی سطح بہت زیادہ ہے، اپنے آپ کو خطرے میں نہ ڈا لیں‘‘۔
