چمپئنز ٹرافی:پاکستان کے سامنے جنوبی افریقہ

 برمنگھم//ہندوستان کے خلاف شرمناک شکست کے بعد غمگین دکھائی دے رہی پاکستانی ٹیم بدھ کو اسی میدان پر آئی سی سی چمپئنز ٹرافی گروپ بی کے اپنے دوسرے میچ میں جنوبی افریقہ کے ایک اور مشکل چیلنج کا سامنا کرنے اترے گی۔ ہندستان نے پاکستان کو ٹورنامنٹ کے پہلے ہی میچ میں 124 رنز کے بڑے فرق سے شکست دی تھی۔ وہیں جنوبی افریقہ ٹیم نے سری لنکا کے خلاف 96 رنز کی فتح کے ساتھ اپنا کھاتہ کھول دیا ہے اور سیمی فائنل کے لئے اپنی پوزیشن مضبوط بنانے کے لحاظ سے پاکستان پر جیت اس کے لئے اہم ہو گی جو فی الحال گروپ بی میں آخری نمبر پر ہے ۔اس گروپ میں گزشتہ چمپئن ہندستان اور جنوبی افریقہ ہی دو مضبوط ٹیمیں ہیں۔ پاکستانی ٹیم کے لئے اس کے کھلاڑیوں کی خراب فٹنس بھی بڑا مسئلہ ہے اور چمپئنز ٹرافی میں ایک میچ کے بعد ہی اس کے تیز گیند باز وہاب ریاض ٹخنے کی چوٹ کی وجہ سے باقی ٹورنامنٹ سے باہر ہو گئے ہیں۔وہاب نے ہندستان کے خلاف 8.4 اوور میں 87 رن لٹائے تھے اور گزشتہ میں بلے بازی کے لیے بھی نہیں اترے تھے ۔ان کی جگہ ٹیم کے پاس اب فاسٹ بولر جنید خان یا آل راؤنڈر فہیم اشرف کو ٹیم میں شامل کرنے کا اختیار ہوگا۔ اس کے علاوہ کئی اور بلے باز بھی میچ میں کرمپ کی وجہ سے پریشان نظر آئے ۔خود کوچ مکی آرتھر نے مانا کہ ان کے کھلاڑی منصوبوں کو میدان پر لاگو ہی نہیں کر پا رہے ہیں۔ بمشکل ہی چمپئنز ٹرافی کے لیے کوالیفائی کر سکی پاکستانی ٹیم کو اگر اپنی امیدیں برقرار رکھنی ہیں تو اسے کھیل کے ہر شعبہ میں جامع بہتری کرنا ہوگی ۔ اظہر علی، محمد حفیظ، شعیب ملک، کپتان سرفراز اچھے بلے باز ہیں۔اگرچہ گزشتہ میچ میں اظہر کے علاوہ باقی بلے بازوں نے مایوس کیا۔گیند بازوں میں محمد عامر، عماد وسیم، حسن علی، شاداب خان اچھے کھلاڑی ہیں۔گزشتہ میچ میں خان 10 اوور میں 52 رن پر ایک وکٹ لے کر پاکستانی ٹیم کے سب سے زیادہ کفایتی بولر رہے تھے ۔ٹیم کو کفایتی بولنگ کے ساتھ فیلڈنگ میں بھی بہتری کی ضرورت ہے کیونکہ اس کے فیلڈرز نے گزشتہ میچ میں یوراج اور وراٹ جیسے خطرناک بلے بازوں کے کیچ ڈراپ کئے تھے ۔  جنوبی افریقہ کی ٹیم دوسری جانب اچھی حالت میں ہے ۔سری لنکا کے خلاف میچ میں اس کے بلے بازوں اور گیند بازوں نے اچھا مظاہرہ کیا۔ہاشم آملہ اس میچ میں 103 رنز کی زبردست سنچری کھیل کر کامیاب رہے تھے ۔وہیں فاف ڈو پلیسس، اے بی ڈیولیرس، ڈیوڈ ملر اور جے پی ڈومنی کے طور پر اس کے پاس اچھے بلے باز ہیں۔ گیند بازوں میں کیگسو ربادا اس کے سب سے زیادہ کامیاب کھلاڑی ہیں جنہوں نے انگلینڈ کے خلاف پریکٹس سیریز میں بھی سب سے زیادہ وکٹ نکالے تھے ۔تجربہ کار عمران طاہر نے گزشتہ میچ میں 27 رن پر چار وکٹ کی بہترین بولنگ کی تھی۔مورن مورکل، وائنے پارنیل اور کرس مورس بھی اس کے بولنگ آرڈر کی طاقت ہیں اور پاکستان کی خراب بلے بازی کو تباہ کرنے کی ذمہ داری ان پر رہے گی۔یواین آئی