نئی دہلی//آبی وسائل دریاؤں کے فروغ اور گنگا کی صفائی ستھرائی، سڑک ٹرانسپورٹ وشاہراہوں اور جہاز رانی کے مرکزی وزیر نتن گڈ کری نے کہا کہ ایران میں چاہ بہار بندرگاہ کا کام کاج 2019 تک شروع کرنے کی کوشش کی جائے گی اور کوشش ہوگی کہ سوویت یونین سے الگ ہونے والے ممالک تک مزید پہنچ ہوسکے گی۔مرکزی نتن گڈکری نے تاجکستان کی راجدھانی دوشامنے میں ہندوستانی سفارت خانے میں سوامی وویکا نند ثقافتی مرکز کے افتتاح کے بعد ہندوستانی برادری سے خطاب کرتے ہوئے یہ بات کہی۔ وزارت سے جاری بیان کے مطابق مسٹر گڈ کری نے پچھلے چار برسوں میں این ڈی اے حکومت کے ذریعہ کی گئی ان کوششوں اور اقدامات کے بارے میں بھی تفصیل سے ذکر کیا۔جن کے سبب عوامی زندگی کے معیاری تبدیلیاں رونما ہوئی۔ انہوں نے بنیادی ڈھانچے کے شعبے میں بڑے پیمانے پر کئے گئے کاموں کے بارے میں بھی بتایا جیسا کہ قومی شاہراہیں 28 کلو میٹر یومیہ کی رفتار سے تعمیر کی جارہی ہیں۔ جس کی مثال پہلے کبھی نہیں ملتی۔ انہوں نے کہا کہ وزیراعظم نریندر مودی کی قیادت میں ملک بدعنوانی سے پاک ،شفاف اور عہد بندی کے ساتھ بہت تیزی سے ترقی کررہا ہے ۔ انہوں نے کہا کہ پچھلے چار برسوں میں ہندوستان کی شبیہ اور وقار میں دنیا بھر میں اضافہ ہوا ہے اور ہمارا درجہ تجارت کو آسان بنانے ، صفائی ستھرائی وغیرہ جیسے میدانوں میں مختلف معیارات پر عالمی سطح پر بہتر ہوا ہے ۔مسٹر نتن گڈ کری تاجکستان کے دو روزہ سرکاری دورے پر ہیں ۔ وہ وہاں عالمی سطح کی کانفرنس میں ہندوستان کی نمائندگی کررہے ہیں۔ کانفرنس کا موضوع ہے '' کارروائی کے لئے بین الاقوامی دہائی:دیرپا ترقی کے لئے پانی '' انہوں نے اپنے دورے کے دوران تاجکستان کے وزیر خارجہ سراج الدین مہرالدین کے ساتھ بات چیت کی جس کے دوران دونوں رہنماؤں نے مختلف میدانوں میں جاری دو طرفہ تعاون کو مزید رفتار دینے کی ضرورت پر زور دیا۔ انہوں نے اس بات سے بھی اتفاق کیا کہ پانی کے دیرپا فروغ کے میدان میں باہمی تعاون میں اضافہ کیاجائے ۔ مسٹر گڈ کری نے تاجکستان کے رہنما کو وزیراعظم نریندر مودی کے اس عہد سے بھی واقف کرایا کہ وہ دونوں ملکوں کے درمیان اقتصادی تعاون میں توسیع دیں گے ۔ دوشنانبے میں سوامی وویکا نند ثقافتی مرکز ہندی ، سنسکرت اور یوگا نیز موسیقی اور ڈانس جیسے مختلف فنون لطیفے کے کلاسوں کا اہتمام کرے گا۔ یہ اہتمام ہندوستانی برادری اور تاجکستان کے عوام کے لئے کیا جائے گا ۔یو این آئی۔
چاہ بہار بندرگاہ کا کام 2019 تک شروع کرنے کی کوشش : حکومت
