منگل کی شام ہوئی جھڑپ کے بعد علاقے میں فورسز پوری طرح سے متحرک
سمت بھارگو
راجوری//پیر پنجال کے بالائی علاقوں میں سیکورٹی فورسز نے منگل کی شام شروع ہونے والی جھڑپ کے بعد اپنی تلاشی کارروائی چوتھے روز بھی جاری رکھی۔ اگرچہ جمعہ کو کسی نئی فائرنگ یا ملی ٹینٹوں کے نشانات کی اطلاع نہیں ملی، تاہم فورسز نے علاقے میں بڑے پیمانے پر محاصرہ اور تلاشی مہم جاری رکھی ہے تاکہ ملی ٹینٹوں کے ممکنہ ٹھکانے یا نقل و حرکت کا سراغ لگایا جا سکے۔ذرائع کے مطابق، یہ کارروائی منگل کی شام اس وقت شروع ہوئی جب پولیس کی جانب سے چلائی گئی سرچ آپریشن کے دوران اسپیشل آپریشن گروپ (ایس او جی) کی ٹیم کا دہشت گردوں سے آمنا سامنا ہوا، جس کے نتیجے میں فائرنگ کا تبادلہ ہوا۔اس جھڑپ کے بعد سے فوج، پولیس اور سی آر پی ایف نے مشترکہ طور پر پورے علاقے میں بڑے پیمانے پر انسدادِملی ٹینسی کی کارروائی شروع کر رکھی ہے۔ فورسز مسلسل ان نشانات کی تلاش میں ہیں جو ملی ٹینٹوں کی موجودگی کی طرف اشارہ کر سکیں۔جمعہ کو بھی یہ آپریشن چوتھے دن تک جاری رہا، اور حکام کے مطابق محاصرہ مزید علاقوں تک بڑھا دیا گیا ہے تاکہ کسی ممکنہ فرار کے راستے کو بند کیا جا سکے۔ سیکورٹی اہلکاروں نے کہا ہے کہ کارروائی اس وقت تک جاری رہے گی جب تک علاقے کو مکمل طور پر محفوظ قرار نہیں دیا جاتا۔
