عظمیٰ نیوز سروس
سرینگر//جموں و کشمیر کے سیاحتی مقامات اور کئی پارکس، جن میں پہلگام کے کچھ پارک بھی شامل ہیں، جو 22 اپریل کے دہشت گردانہ حملے کے بعد بند ہو گئے تھے، منگل کو دوبارہ کھول دیئے گئے۔پارکوں کے دوبارہ کھلنے کا خیرمقدم سیاحوں اور مقامی لوگوں نے کیا ہے ۔انہوں نے کہا کہ پارکوں کے ارد گرد حفاظتی اہلکار تعینات کیے گئے تھے تاکہ علاقوں کو محفوظ بنایا جا سکے اور تحفظ کا احساس پیدا کیا جا سکے۔چھبیس افراد، جن میں زیادہ تر سیاح تھے، دہشت گردوں کے ہاتھوں پہلگام کے بائسرن میں مارے گئے۔ لیفٹیننٹ گورنر منوج سنہا نے ہفتے کے روز 16 مقامات کو دوبارہ کھولنے کا حکم دیا ۔ انہوں نے کہا کہ منزلیں مرحلہ وار دوبارہ کھولی جائیں گی۔پہلے مرحلے میں وادی کشمیر میں آٹھ پارکوں کو دوبارہ کھولا گیا۔پہلگام میں وادی بیتاب اور پہلگام بازار کے قریب پارکس، ضلع اننت ناگ میں ویرناگ، کوکرناگ اور اچھہ بل باغات، بادام واری، نگین کے قریب بطخ پارک، اور حضرت بل کے قریب تقدیر پارک کومنگل کو دوبارہ کھول دیا گیا۔اسی طرح جموں خطہ کے ساتھ ساتھ کٹھوعہ میں سرتھل اور دھگر، دیوی پنڈی، ریاسی میں سیاد بابا اور سولا پارک، ڈوڈہ میں گلڈنڈا اور جئے ویلی، اور ادھم پور میں پنچیری سمیت آٹھ مقامات کو دوبارہ کھول دیا گیا۔حکام نے بتایا کہ ویری ناگ میں سکولی بچوں کی ایک بڑی تعداد نے سیاحوں کا استقبال کیا۔پنجاب کے پٹیالہ سے تعلق رکھنے والے ایک سیاح نے کہا، “ہم یہاں آ کر پہلے ہی اچھا اور خوش محسوس کر رہے تھے، لیکن پارک کا دوبارہ کھلنا اور ہمارا استقبال بہت اچھا ہے۔”سیاحوں کی مدد کے لیے ٹورسٹ پولیس کے اہلکار بھی تعینات تھے۔
