یو این آئی
نئی دہلی//وزیر اعظم نریندر مودی نے پہلگام دہشت گردانہ حملے کے قصورواروں اور ان کے حامیوں کو سخت سبق سکھانے کیلئے ہفتہ کو ایک بار پھر پختہ اور فیصلہ کن کارروائی کرنے کا عہد کیا۔وزیر اعظم نے ہندوستان کے دورے پر آئے انگولا کے صدر جوا لورینکو کے ساتھ بات چیت کے بعد میڈیا سے خطاب کرتے ہوئے کہا ’’ہم دہشت گردوں اور ان کی حمایت کرنے والوں کے خلاف سخت اور فیصلہ کن کارروائی کرنے کے لیے پرعزم ہیں‘‘۔ انہوں نے انگولا کے صدر کا سرحد پار دہشت گردی کے خلاف ہندوستان کی لڑائی میں حمایت کے لیے شکریہ ادا کیا۔ مودی نے کہا کہ دونوں ملک دہشت گردی کے خلاف متحد ہیں، جو انسانیت کے لیے سب سے بڑا خطرہ ہے۔انہوں نے پہلگام دہشت گردانہ حملے کے متاثرین کے تئیں انگولا کی طرف سے تعزیت کا اظہار کرنے پر لورینکو کا شکریہ ادا کیا۔قابل ذکر ہے کہ حکومت ہند نے پہلگام دہشت گردانہ حملے کے قصورواروں اور معاونین کو سزا دینے کا عزم ظاہر کیا ہے۔ اس حملے میں 26 افراد جن میں زیادہ تر سیاح تھے، بے دردی سے مارے گئے تھے ۔ انہوں نے مسلح افواج کو اس معاملے میں جوابی کارروائی کرنے کی آزادی دی ہے۔
