عظمیٰ نیوز سروس
نئی دہلی// وزیر اعظم نریندر مودی کی سربراہی میں کابینہ کمیٹی برائے سلامتی نے پہلگام دہشت گردانہ حملے کے بارے میں ہندوستان کے ممکنہ ردعمل کے بارے میں قیاس آرائیوں کے درمیان جموں و کشمیر کی مجموعی سیکورٹی صورتحال کا جائزہ لیا۔کابینہ کمیٹی برائے سلامتی کی میٹنگ پہلگام حملے پر وزیر اعظم مودی کی اعلیٰ دفاعی قیادت کے ساتھ تبادلہ خیال کے ایک دن بعد ہوئی۔اس معاملے سے واقف لوگوں نے بتایا کہ اس میں وزیر دفاع راج ناتھ سنگھ، وزیر داخلہ امت شاہ اور وزیر خارجہ ایس جے شنکر نے شرکت کی۔حکومتی ذرائع نے بتایا کہ منگل کو ہونے والی میٹنگ میں مودی نے زور دے کر کہا کہ مسلح افواج کو پہلگام دہشت گردانہ حملے پر ہندوستان کے ردعمل کے موڈ، اہداف اور وقت کے بارے میں فیصلہ کرنے کے لیے “مکمل آپریشنل آزادی” حاصل ہے۔میٹنگ میں وزیر دفاع راج ناتھ سنگھ، این ایس اے اجیت ڈوول اور تینوں افواج کے سربراہان نے شرکت کی۔ذرائع نے بتایا کہ مودی نے اس بات کی تصدیق کی کہ دہشت گردی کو ایک بھاری ضرب کیساتھ نمٹنے کا قومی عزم ہے۔
