بابر نفیس ،ڈوڈہ
بجلی انسانی زندگی کی ایک اہم بنیادی سہولیات ہے۔جہاں وقت ڈیجیٹل ہوتا جا رہا ہے وہی تمام تر میدانی و پہاڑی علاقہ جات میں بجلی پہنچانے کی کوشش بھی کی جارہی ہے تاکہ اس ڈیجیٹل دور میں لوگ اپنامستقبل تاریک محسوس نہ کریں۔لیکن پھر بھی ملک کے کئی ایسے علاقے موجود ہیں جہاں لوگ آج بھی بجلی جیسی بنیادی سہولیات سے محروم ہیں اوراس کی وجہ سے ان کی زندگی متاثر ہو رہی ہے۔ایسے ہی کچھ علاقوںمیں جموں کے ضلع ڈوڈہ کے گاؤں بھی ہے۔جہاں آج بھی بجلی جیسی بنیادی سہولیات سے لوگ محروم ہیں۔ حالانکہ ان میں سے کئی ایسے مقامات ہیں جہاں پر عرصہ دراز پہلے بجلی پہنچانے کا کام شروع کیا گیا تھا۔ لیکن اس کے مکمل انتظام کی بجائے تاروں کو سرسبز درختوں یالکڑی کے کھمبوں کے ساتھ خطرناک طریقہ سے جوڑ دیا گیا ہے۔ جس سے یہ صاف ظاہر ہوتا ہے کہ محکمہ ابھی تک ان علاقہ جات میں لوگوں کے مسائل پرسنجیدگی سے غور نہیں کررہاہے۔
اس سلسلے میں علاقہ کے کئی باشعور لوگوں نے انتظامیہ سے بات کی اور اور اپنی مشکلات کا ازالہ کرانے کی یاد دہانیاں بھی کرائیں،لیکن تاحال سب بے سود۔اس سلسلے میں سماجی کارکن آصف اقبال بٹ کا کہنا ہے کہ بجلی انسانی زندگی کی بنیادی سہولیات ہونے کے ساتھ ساتھ خطرناک بھی ثابت ہوسکتی ہے۔ انہوں نے کہا کہ چناب ویلی میں اب تک کئی مقامات پر بجلی سے مکانات جلنے کی خبروں کے ساتھ ساتھ انسانی جانیں تلف ہوجانے کی بھی خبریں سامنے آتی رہی ہیں۔ لیکن اس کے باوجود ابھی تک سنجیدگی کا مظاہرہ نہیں کیا گیا کئی مقامات پر محکمہ کی اس عدم دلچسپی اور غفلت کی وجہ سے کروڑوں کی جائیدادوں کا نقصان ہوا ہے۔جبکہ ضلع ڈوڈہ کے بعض پہاڑی علاقہ جات آج بھی بجلی جیسی بنیادی سہولیات کا کوئی فائدہ حاصل نہیںکر پارہے ہیں،کیونکہ عرصہ دراز سے بجلی کی تاریں شاداب درختوں اور کئی مقامات پر لکڑی کےبوسیدہ کھمبوں کے سہارے لٹکی ہوئی ہیں۔جن سے ہر وقت جانی و مالی نقصان کا اندیشہ بنا رہتا ہے۔ اس لیے انتظامیہ کو فوری طور پر ان علاقوں کا جائزہ لے کر بجلی کی تاروں کے لیے مکمل ستونوں کا انتظام کرنا چاہیے۔انہوں نے کہا کہ تیز آندھی یا زور دار ہوائوںکے باعث درختوںاور جھُکے ہوئے ناکارہ کھمبوںپر لٹکتی ہوئی یہ بجلی کی ترسیلی تاریںٹوٹ پھوٹ ہوکرانسانی جان و مال کے لئے انتہائی تشویش ناک بنی ہوئی ہیں،جس کے نتیجہ میں علاقے میں ہر وقت خوف و ڈر کا ماحول بنا رہتا ہے۔
بلاک ترقیاتی کونسلر کاہرہ، چودھری فاطمہ کا اس سلسلے میںیہی کہناہےکہ متعلقہ محکمہ کو چاہیے کہ وہ اِن علاقہ جات کا جائزہ لینے کر جلد از جلد ایک کمیٹی تشکیل دے ،جو علاقہ میں لگائے جانے والے پولوں کا اندازہ جائزہ لیںتاکہ مستقبل کےلئےان کھمبوں اور تاروں کو لوگوں کے لیے محفوظ اورفائدہ مند بنایاجاسکے۔ انہوں نے یہ بھی بتایا کہ لاک ڈون کے ایام میں زیر تعلیم بچوں کوبجلی کی نایابی کی وجہ سے شدید مشکلات سے دوچار ہونا پڑا ۔اس لئے اب انتظامیہ کو اس سلسلے میں سنجیدگی سے غور کرنے کی ضرورت ہے۔ مقامی لوگوں نے ا س سلسلے میں کئی مرتبہ ضلعی انتظامیہ اور گورنر انتظامیہ کے سامنے بھی شکایات درج کی ہیں لیکن ابھی تک کوئی سنوائی نہیں ہوسکی ہے۔فاطمہ نے مزید کہا کہ اس ڈیجیٹل دور میں جہاں تیز آندھی آنے کی وجہ سے بجلی کی تاریں زمین بوس ہوتی ہیں ،وہیں کئی بار اسکولی بچے بھی ان تاروں کی زد میں آکر شکار ہو سکتے ہیں۔ کئی مقامات پرا سکولوں کے اوپر سے تاریں لگی ہوئی ہیں اور جو کافی کمزور اور خستہ ہو چکی ہیں، ان کو فوری طور پر تبدیل کرنے کی اشد ضرورت ہے،تاکہ کوئی حادثہ پیش نہ آئے۔
سماجی کارکن شہنواز میر نے اس بارے میں بتایا کہ چناب ویلی میں آج بھی کئی علاقے قدیم زمانے کی طرح لوگ بجلی سہولیات کی عدم دستیابی سے اندھیرے میں دڈوبے ہوئے ہیں،جنہیں بجلی کی روشنی سے منور کرنے کی ضرورت ہے، تاکہ آنے والے وقت میں طلباء کو تعلیم حاصل کرنے میں مشکلات کا سامنا نہ کرنا پڑے۔ ضلع ترقیاتی کونسلرمعراج ملک نے بات کرتے ہوئے کہا کہ ہر سال محکمہ کو بجلی کی ترسیلی لائنیںدرست کرنے اور صارفین بجلی تک ٹھیک ڈھنگ کے ساتھ بجلی پہنچانے اور ناکارہ سسٹم ہٹانے کے لئےکروڑوں روپے واگزار ہوتی رہتی ہیں۔لیکن جب زمینی سطح پر نظر ڈالی جاتی ہے تو صورت حال میں کوئی تبدیلی نہیں دکھائی دیتی ہے۔ انہوں نے کہا کہ اگر جموں و کشمیر کے ان مقامات پر فوری طور پر بجلی کے مکمل بحالی نہ کی گئی تو لوگ احتجاج کرنے پر مجبور ہو جائیں گے۔ موصوف نے حالیہ کونسل میں اس بات پر زور دیا کہ محکمہ ابھی تک جن علاقوں میںبجلی کی فراہمی کا بندوبست نہ کر پایا ہے، ان علاقوں میں بجلی سپلائی پہنچانے کا معقول انتظام کیا جانا چاہیے۔
جب محکمہ کے اسسٹنٹ الیکڑیکل انجینئرٹھاٹھری معراج سے بات کی گئی تو انہوں نے بتایا کہ اُن مقامات کی فہرست بنائی گئی ہے، جہاں ابھی تک بجلی کا معقول انتظام نہیں ہےاور ان علاقوں کے لیے بجلی سپلائی پہنچانے کے لئے تاریں سینگشن ہوچکی ہیں، صرف ٹینڈرنگ کا کام باقی ہے۔ اسی طرح محکمہ کے ایگز یکٹوانجینئرکشتوار الطاف حسین سے بات کا کہنا ہےکہ آنے والے کچھ ہفتوں میں بجلی کی تار یںاور جہاں جہاں لکڑی کے کھمبے لگےہوئے ہیں ،ان کو تبدیل کر کے لوہے کے کھمبوں کا انتظام کیا جائے گا۔ انتظامیہ اس سلسلے میں متحرک ہےاور ٹھیکداروں سے بات بھی کی جا رہی ہےانہوں نے یقین دلایا ہے کہ عنقریب علاقہ کے لوگوں کو بجلی سپلائی فراہم کرنے کا کام شروع کیا جائے گا۔بہرحال مقامی لوگوں کے پاس محکمہ کی یقین دہانی پر یقین کرنے کے علاوہ اور کوئی چارہ بھی نہیں ہے۔ لیکن اس سوال کا جواب کون دے گا کہ آزادی کے 75سال بعد بھی ملک کے اِن دور دراز پہاڑی علاقوں میں بجلی کا بہتر نظام کیوں ممکن نہیں ہو سکا ہے؟
[email protected]>
