پہاڑی اور گوجری زبانوں

حکومت نے گزشتہ ماہ ایک حکمنامے کے ذریعہ کشمیری ، ڈوگری اور بودھی زبانوں کو تعلیمی نصاب میں شامل کرنے کا فیصلہ لیاتھا ۔اس فیصلے کا جہاں ہر سطح پر خیر مقدم کیاگیا وہیں حکومت کو اس بات کیلئے تنقید کا نشانہ بھی بنایاگیاکہ اس نے پہاڑی ، گوجری اور پنجابی زبانوں کو نظرانداز کردیا ۔ بعد میں اس فیصلے میں ترمیم کرتے ہوئے سرکار نے پنجابی زبان کو بھی نصاب میں شامل کرنے کا فیصلہ کیا تاہم اس بار پھر پہاڑی اورگوجری زبانوں کو چھوڑ دیا گیا، جو سراسر ایک نا انصافی ہے، جس کے نتیجہ میں پہاڑی اور گوجری زبانیں بولنے والے طبقوں میں شدید غم و غصہ پایاجارہاہے اور ان کی طرف سے مشترکہ طور پر مہم بھی چلائی جارہی ہے ۔ ریاست کے خطہ پیر پنچال میں آباد دونوں طبقوں کے لیڈران اور نوجوانوں کی طرف سے حکومت پر اس بات کا دبائو بڑھایاجارہاہے کہ وہ ان دو زبانوں کو بھی تعلیمی نصاب میں شامل کرنے کے اقدامات کرے اور پہلے کئے گئے فیصلے میں ترمیم کی جائے لیکن ابھی تک سرکاری سطح پر اس حوالے سے کوئی بھی پیشرفت دکھائی نہیں دی ۔خطے کے لیڈران نے اس معاملے پر حکام سے ملاقاتیں کرکے ان سے زبانوں کو نصاب کا حصہ بنانے پر زور دیا ہے ،جس پر یقین دہانی تو دلائی گئی ہے لیکن عملی سطح پر اقدامات کا انتظار کیاجارہاہے ۔یہ بات قابل ذکر ہے کہ پونچھ اور راجوری کے علاوہ اوڑی ،کرناہ اورریاست کے دیگر کئی علاقوں میں پہاڑی اور گوجری زبانوں کا چلن ہے اور ان علاقوںمیں بس رہی آبادی کی مادری زبانیں بھی یہی ہیں ۔ان دونوں زبانوں کے اپنے بھر پورعلمی و ادبی ذخائر ہیں، علاوہ ازیں ان کی ترویج و اشاعت کیلئے ریاستی کلچرل اکیڈمی  میںسے علیحدہ علیحدہ شعبے بھی ہیں جہاں ان زبانوں میں  اچھا خاصا کام بھی ہورہاہے ۔ پہاڑی اور گوجری دوردرشن اور آل انڈیا ریڈیو کی   نشریات میں بھی  شامل ہیں جبکہ یہ زبانیں ریاستی آئین کے شیڈیول میںبھی درج ہیں ۔زبان  اپنے بولنے والوں کی تہذیبی و ثقافتی شناخت کا مظہر ہوتی ہیں اور صدیوں کے تاریخی تبادلوں اور لین دین کے طفیل تواریخ کا ماخذ بھی، لہذا یہ دونوں زبانیں پہاڑی اور گوجر طبقوں کی  تہذیبی شناخت بھی ہیں اور دیگر ثقافتوں اور زبانوں کے فروغ کا ایک عنصربھی۔جموں و کشمیر کی یہی خصوصیت ہے کہ یہاں کئی زبانیں بولنے والے لوگ بستے ہیں اور ہر ایک خطے کی اپنی تہذیب و ثقافت ہے جسے برقرار رکھنے کیلئے مقامی زبانوں کو فروغ دیاجاناضروری ہے ۔اب اگر سرکار نے مقامی زبانوں کو فروغ دینے کیلئے اقدامات کرنا شروع کئے ہیںتو گوجری اور پہاڑی زبانوں کو نظر انداز کرنا کسی بھی طور قرین ِانصاف نہیں ۔جہاں سرکاری سطح پر اردو زبان کو اس کا درجہ دینے کی ضرورت ہے وہیں مقامی زبانوں کو بھی فروغ دیاجائے تاکہ تہذیب و ثقافت زندہ رہ سکے اور قومی تشخص بھی برقرار رہے ۔امید کی جانی چاہئے کہ حکومت پہاڑی اور گوجری زبانوں کے ساتھ بھی انصاف کرے گی اور انہیں بھی نصاب میں شامل کیاجانا چاہئے۔